پشین ، سی ٹی ڈی کا انٹیلی جنس بیسڈ آپریشن، 9 مبینہ حملہ آور ہلاک

ہلاک ہونے والے حملہ آور شرپسندی کی مختلف کارروائیوں میں ملوث تھے جن سے اسلحہ و گولہ بارود بھی برآمد ہوا ہے، ترجمان سی ٹی ڈی، وزیراعلیٰ بلوچستان سرفراز بگٹی کا سی ٹی ڈی کی کارروائی پر خراج تحسین

فیصل علوی ہفتہ 26 اپریل 2025 14:36

پشین ، سی ٹی ڈی کا انٹیلی جنس بیسڈ آپریشن، 9 مبینہ حملہ آور ہلاک

پشین(اردوپوائنٹ اخبار تازہ ترین۔26اپریل 2025)بلوچستان کے علاقے پشین میں سی ٹی ڈی نے انٹیلی جنس بیسڈ آپریشن کے دوران 9 مبینہ حملہ آوروں کو ہلاک کردیا، ہلاک حملہ آوروں سے اسلحہ و گولہ بارود برآمد ہوا ہے۔ ہلاک ہونے والے حملہ آور شرپسندی کی مختلف کارروائیوں میں ملوث تھے۔ ہلاک افراد شرپسندی کی مختلف کارروائیوں میں ملوث تھے،ترجمان سی ٹی ڈی کے مطابق پشین کے علاقے خنائی بابا میں کاﺅنٹر ٹیررازم ڈپارٹمنٹ (سی ٹی ڈی) نے خفیہ اطلاع پر آپریشن کیا۔

کارروائی کے دوران دہشتگردوں نے اہلکاروں پر فائرنگ کی جس پر بھرپور جوابی کارروائی کی گئی۔ فائرنگ کے تبادلے میں 9مبینہ حملہ آور ہلاک ہوگئے۔سی ٹی ڈی حکام کے مطابق علاقے میںآپریشن کے بعد کلیئرنس اور سینیٹائزیشن آپریشن جاری رہا تھا تاکہ ممکنہ طور پر موجود دیگر خوارج کا بھی خاتمہ کیا جا سکے ۔

(جاری ہے)

دریں اثناءوزیراعلیٰ بلوچستان سرفراز بگٹی نے سی ٹی ڈی کی کارروائی پر خراج تحسین پیش کرتے ہوئے کہا کہ خفیہ معلومات پرمبنی آپریشن سے ایک بڑاسانحہ روکا گیا۔

وزیراعلیٰ بلوچستان سرفراز بگٹی کا کہنا تھا کہ قانون نافذ کرنے والے ادارے دہشت گردی کے خاتمے تک سرگرم رہیں گے، امن دشمنوں کے عزائم کبھی کامیاب نہیں ہونے دیں گے۔ واضح رہے کہ چند روز قبل بھی بلوچستان کے علاقے دکی میں کاونٹر ٹیررازم ڈیپارٹمنٹ اور دیگر اداروں کی مشترکہ کارروائی میں 5 دہشت گردوں کو ہلاک کردیا گیا تھا۔ سی ٹی ڈی حکام کے مطابق کارروائی کے دوران دہشتگردوں نے اہلکاروں پر فائرنگ کی جس پر بھرپور جوابی کارروائی کی گئی تھی۔

جھڑپ کے نتیجے میں پانچ دہشتگرد مارے گئے تھے جن کی لاشوں کو ضابطے کی کارروائی کیلئے قریبی ہسپتال منتقل کر دیا گیا تھا۔سی ٹی ڈی حکام کا کہنا تھا کہ ہلاک شرپسندوں کا تعلق کالعدم تنظیم سے تھا۔سی ٹی ڈی کے مطابق ہلاک دہشتگردوں کے قبضے سے اسلحہ اور گولہ بارود بھی برآمد ہوا تھا۔ سی ڈی ٹی حکام کے مطابق معاملے کی مزید تحقیقات کا آغاز بھی کر دیا گیا تھا۔سیکورٹی ذرائع کا کہنا تھا کہ مارے گئے دہشت گرد مزدوروں اور سکیورٹی فورسز پر حملوں میں ملوث تھے۔حکام کا کہنا ہے کہ مارے گئے دہشت گردوں کا تعلق کالعدم تنظیم سے تھا جو دہشت گردی کی مختلف کارروائیوں میں بھی ملوث تھے۔