Live Updates

سانحہ 9مئی، 11مقدمات میں فرد جرم ،چالان کی فراہمی مکمل نہ ہوسکی

پاکستان کی سلامتی کے معاملے پر پوری قوم سیسہ پلائی دیوار ہے،شیخ رشید

ہفتہ 26 اپریل 2025 20:45

اسلام آباد (اُردو پوائنٹ اخبارتازہ ترین - این این آئی۔ 26 اپریل2025ء)اے ٹی سی راولپنڈی میں جج امجد علی شاہ نے سانحہ 9مئی سے متعلق درج 11مقدمات پر سماعت کی، سماعت کے دوران سابق وفاقی وزیر داخلہ شیخ رشید، سابق صوبائی وزیر قانون راجہ بشارت اور رہنما تحریک انصاف عمر ایوب عدالت میں پیش ہوئے،وکلائے صفائی ملک فیصل ایڈوکیٹ اور غلام مرتضی حسنین سنبھل بھی عدالت کے روبرو حاضر ہوئے۔

(جاری ہے)

چالان کے نقول کی فراہمی کا عمل مکمل نہ ہونے کے باعث ملزمان کے خلاف فرد جرم عائد نہ کی جا سکی، عدالت نے کیس کی سماعت 3مئی تک ملتوی کر دی۔عدالت کے باہر میڈیا سے گفتگو کرتے ہوئے شیخ رشید نے کہا کہ پاکستان کی سلامتی ہمیں جان سے زیادہ عزیز ہے، سندھ طاس معاہدہ ختم کرنا بھارت کا گھمنڈ ہے ۔انہوں نے کہا کہ پاکستان کی سلامتی کے معاملے پر پوری قوم سیسہ پلائی دیوار ہے،یہ قوم پاکستان کے لیے جان دینے کو بھی تیار ہے، دشمن ہماری یکجہتی کو توڑ نہیں سکتا۔