Live Updates

بیرسٹر سلطان محمود چوہدری سے وزیر اعظم کی ملاقات ،آزادکشمیرمیں تعمیر و ترقی کو تیز کرنے کا فیصلہ

پہلگام واقعہ کی آڑ میں کشمیری عوام پر عرصہ حیات تنگ ، انٹرنیشنل کمیونٹی بھارت کو مکروہ عزائم سے باز رکھنے کیلئے دبائوڈالے،گفتگو

اتوار 27 اپریل 2025 16:25

اسلام آباد(اُردو پوائنٹ اخبارتازہ ترین - این این آئی۔ 27 اپریل2025ء)صدر ریاست آزاد جموں وکشمیر بیرسٹر سلطان محمود چوہدری سے وزیر اعظم آزاد کشمیر چوہدری انوار الحق نے ایوان صدر کشمیر ہائوس اسلام آباد میںون آن ون تفصیلی ملاقات کی۔ اس موقع پر صدر آزاد جمو ں وکشمیر بیرسٹر سلطان محمود چوہدری اور وزیر اعظم آزادکشمیر چوہدری انوار الحق نے بھارت کی طرف سے ایک باقاعدہ سازش کے تحت فالس آپریشن کے ذریعے پہلگام واقعہ کی شدید مذمت کی اور اس بات پر تشویش کا اظہار کیاکہ بھارت نے پہلگام واقعہ کی آڑ میں مقبوضہ کشمیر میں کشمیری عوام پر عرصہ حیات تنگ کر دیا ہے اور وہاںبڑے پیمانے پر انسانی حقوق کی پامالی اور ظلم و بربریت شروع کر دی ہے۔

انہوںنے کہاکہ بھارتی سرکار مودی کی ہندوتوا پالیسیوں پر گامزن ہو کر مقبوضہ کشمیر میں کشمیریوں پر ظلم و جبر کی نئی داستانیں رقم کر رہا ہے انٹرنیشنل کمیونٹی بھارت کو اُس کے مکروہ عزائم سے باز رکھنے کیلئے دبائوڈالے۔

(جاری ہے)

صدر آزاد جمو ں وکشمیر بیرسٹر سلطان محمود چوہدری اور وزیر اعظم آزادکشمیر چوہدری انوار الحق نے اس بات کا بھی اعادہ کیا کہ آزادی کے بیس کیمپ سے مقبوضہ کشمیر میں کشمیری عوام پر جاری بھارتی مظالم اور فسطائیت کو بے نقاب کرنے اور مسئلہ کشمیر کو ہر فورم پر اُجاگر کرنے کیلئے کوششیں مزید تیز کی جائیں۔

صدر آزاد جمو ں وکشمیر بیرسٹر سلطان محمود چوہدری اور وزیر اعظم آزادکشمیر چوہدری انوار الحق نے آزادکشمیر میں گڈ گورننس کے قیام کے لئے جاری کوششوں پر اطمینان کا اظہار کیا اور اس بات کا فیصلہ بھی کیا کہ گڈ گورننس میں مزید بہتری کے لئے کاوشیں تیز کی جائیں۔ صدر آزاد جمو ں وکشمیر بیرسٹر سلطان محمود چوہدری اور وزیر اعظم آزادکشمیر چوہدری انوار الحق نے آزادکشمیرمیں تعمیر و ترقی کو تیز کرنے کا بھی فیصلہ کیا تاکہ ریاست میں خوشحالی کے نئے دور کا آغاز ہو اور اس کے ثمرات عام آدمی کی زندگی پر نمایاں ہوں۔

صدر آزاد جمو ں وکشمیر بیرسٹر سلطان محمود چوہدری اور وزیر اعظم آزادکشمیر چوہدری انوار الحق نے مقبوضہ کشمیر کی تازہ ترین صورتحال کے علاوہ آزادکشمیر کی سیاسی صورتحال پر بھی تفصیلی گفتگو کی ۔اس موقع پر صدر آزاد جمو ں وکشمیر بیرسٹر سلطان محمود چوہدری اور وزیر اعظم آزادکشمیر چوہدری انوار الحق کے درمیان باہمی دلچسپی سمیت دیگر اُمور پر بھی تبادلہ خیا ل کیا گیا۔