صوبائی دارلحکومت پشاورمیں گزشتہ 24 گھنٹوں کے دوران فائرنگ کے واقعات میں 10 افراد جاں بحق ہوگئے

پشاور میں اسلحے کی بھرمار اور گلی گلی اسلحے کی نمائش کے باعث قتل کی بڑھتی وارداتوں پر سوشل میڈیا صارفین نے بھی سوالات اٹھا دیے

اتوار 27 اپریل 2025 19:30

پشاور(اُردو پوائنٹ اخبارتازہ ترین - این این آئی۔ 27 اپریل2025ء)صوبائی دارلحکومت پشاورمیں گزشتہ 24 گھنٹوں کے دوران فائرنگ کے واقعات میں 10 افراد جاں بحق ہوگئے۔پشاور کے تھانہ پھندو پولیس کے مطابق 6 افراد کے قتل کا واقعہ جمیل چوک رنگ روڈ پر پیش آیا ہے جب وہ شادی کی تقریب کے بعد واپس گاڑی میں جا رہے تھے اسی دوران ان کی گاڑی پر گولیوں کی بوچھاڑ کردی گئی۔

نامعلوم افراد کی فائرنگ سے 5 افراد موقع پر جاں بحق ہوگئے، جن کی شناخت عبد اللہ ولد بادام گل، طاہر ولد نواب، اسامہ ولد حمایت اللہ، اویس ولد سید بادشاہ اور وقاص کے نام سے ہوئی۔پشاور میں فائرنگ کے مذکورہ واقعے میں ایک راہگیر یحییٰ ولد سرکار بھی گولیاں لگنے سے جاں بحق ہوا اور ثاقب ولد سید احمد شاہ زخمی ہوا ہے۔

(جاری ہے)

واقعے کے حوالے سے بتایا گیا کہ افسوس ناک واقعے میں جاں بحق ہونے والوں میں تین دوست شامل ہیں، جن میں سے ایک کا تعلق ہزار خوانی اور دوسرے کا صوابی سے بتایا جا رہا ہے۔

گاڑی پر فائرنگ کی اطلاع پر ایس پی فقیر آباد محمد ارشد خان اور ڈی ایس پی عمر آفریدی بھی نفری کے ہمراہ موقع پر پہنچ گئے اور لاشوں کو پوسٹمارٹم اور زخمی کو ابتدائی طبی امداد کے لیے اسپتال منتقل کردیا۔پولیس کا کہنا تھا کہ واقعہ سابقہ دشمنی کا شاخسانہ ہے تاہم مقتولین کے لواحقین کی شکایت پر ملزمان کے خلاف مقدمہ درج کیا جائے گا۔پولیس کے مطابق پھندو میں پیش آنے والے افسوس ناک واقعے میں ہزار خوانی کے سابق ناظم حمایت خان کے جوان سالہ فرزند اسامہ کو بھی قتل کردیا گیا اور پولیس نے بتایا کہ بڈھ بیر سے تعلق رکھنے والے مقتولین کی سابقہ دشمنی چلی آرہی تھی۔

خیال رہے کہ پشاور میں اسلحے کی بھرمار اور گلی گلی اسلحے کی نمائش کے باعث قتل کی بڑھتی وارداتوں پر سوشل میڈیا صارفین نے بھی سوالات اٹھا دیے ہیں جہاں 24 گھنٹوں کے دوران فقیر آباد، پھندو، شاہ پور سمیت شہر کے دیگر علاقوں میں 10 افراد کے قتل کے بعد شہر کی فضا سوگوار ہوگئی ہے۔پشاور کے علاقے فقیر آباد میں اسکول ٹیچر کو قتل کیا گیا تھا اور فقیر آباد میں ہی ٹک ٹاکر خاتون کو فائرنگ کرکے قتل کیا گیا، اسی طرح شاہ پور میں لیڈی کانسٹیبل اور پھندو میں گاڑی پر فائرنگ کرکے 6 افراد کے قتل کا واقعہ پیش آیا۔