Live Updates

پی ایس ایل 10‘ بابرآعظم کو لگاتار دوسری بارآئوٹ کرنے پر محمد عامر کا منفرد جشن

پشپا کے اسٹائل میں گلے کے نیچے سے ہاتھ بھی گھمایا‘ منہ سے اشارہ کرتے ہوئے دھماکے کا بھی اشارہ کیا

پیر 28 اپریل 2025 12:57

لاہور(اُردو پوائنٹ اخبارتازہ ترین - این این آئی۔ 28 اپریل2025ء)پاکستان سپر لیگ 10 میں پاکستان کے ٹاپ بیٹر بابر اعطم کو لگاتار دوسری بار آئوٹ کرنے پر محمد عامر نے گرائونڈ میں منفرد انداز میں جشن منایا۔پشاور زلمی کے کپتان بابر اعظم اس بار پی ایس ایل میں اپنے پرانے رنگ میں نظر نہیں آرہے اور اب تک کھیلے جانے والے میچز میں ان کی کارکردگی نہایت واجبی سی رہی ہے، آج کوئٹہ کے خلاف میچ میں وہ ایک بار پھر سے محمد عامر کا شکار بن گئے۔

(جاری ہے)

انٹرنیشنل کرکٹ سے ریٹائرمنٹ لینے والے کوئٹہ کے فاسٹ بولر محمد عامر نے بابراعظم کو 12 رنز پر ایل بی ڈبلیو کردیا، بابر نے آئوٹ ہونے سے پہلے ایک چوکا اور چھکا بھی لگایا۔محمد عامر پشاور کے کپتان کو آئوٹ کرنے کے بعد دوڑتے ہوئے اپنی ٹیم کوئٹہ کے ڈگ آئوٹ کی طرف بھاگے اور پشپا کے اسٹائل میں گلے کے نیچے سے ہاتھ بھی گھمایا۔اس کے بعد انھوں نے منہ سے اشارہ کرتے ہوئے دھماکے کا بھی اشارہ کیا، اس موقع پر کوئٹہ کیمینٹور ویون رچرڈز انھیں ٹھنڈا رہنے کا اشارہ کرتے ہوئے نظر آئے۔خیال رہے کہ اس سے قبل بھی کوئٹہ گلیڈی ایٹرز اور پشاور کے درمیان ہونے والے پی ایس ایل 10 کے پہلے مقابلے میں لیفٹ آرم فاسٹ بولر محمد عامر نے ہی بابر اعظم کو پویلین کا راستہ دکھایا تھا۔