صنعتی ادارے اور ورکرز حفاظتی اصولوں کی پابندی یقینی بنائیں‘ مریم نواز

ہر ادارے کی ترقی اور اہداف کے حصول کیلئے افرادی قوت کا صحت مند اور محفوظ ہونا ضروری ہے،عالمی دن پر پیغام

پیر 28 اپریل 2025 15:03

صنعتی ادارے اور ورکرز حفاظتی اصولوں کی پابندی یقینی بنائیں‘ مریم نواز

لاہور(اُردو پوائنٹ اخبارتازہ ترین - این این آئی۔ 28 اپریل2025ء) وزیراعلیٰ پنجاب مریم نواز شریف نے کہا ہے کہ صنعتی ادارے اور کام کرنے والے ورکرز حفاظتی اصولوں کی پابندی یقینی بنائیں۔روزگار کی جگہ پر تحفظ اور صحت یقینی بنانے کے عالمی دن پر اپنے پیغام میں وزیراعلیٰ پنجاب مریم نواز کا کہنا تھا کہ ہر ورکر کو محفوظ اور صحت مند ماحول کی فراہمی بنیادی حق ہے، ہر ادارے کی ترقی اور اہداف کے حصول کیلئے افرادی قوت کا صحت مند اور محفوظ ہونا ضروری ہے، محفوظ ورک پلیس معیشت کی ترقی اور خوشحال معاشرے کی بنیاد بھی ہے۔

انہوں نے کہا کہ پنجاب میں ورکرز کی فلاح و بہبود، ان کی حفاظت اور صحت کیلئے کئی ٹھوس اقدامات کئے جا رہے ہیں، ورکرز کی عزت، صحت، تحفظ اور سہولیات کی فراہمی کو یقینی بنایا جا رہا ہے۔

(جاری ہے)

ان کا کہنا تھا کہ کام کرنے والوں کے لئے ایک ایسا کلچر فروغ دیا جائے، جہاں ہر فرد کی جان اور صحت مقدم ہو، سب کو کام کی جگہوں کو محفوظ، صحت مند اور خوشحال بنانے کے مشن میں یکجا ہو کر اپنا کردار ادا کرنا ہوگا۔مریم نواز شریف نے مزید کہا کہ آج کا دن ملازمت کے مقامات پر ممکنہ خطرات اور حادثات سے خبردار کرنے کا شعور بیدار کی یاد دلاتا ہے، عالمی یوم پیشہ وارانہ سلامتی اور صحت 2025ء کا تھیم حفاظت اور صحت کیلئے آرٹیفیشل انٹیلی جنس اور ڈیجیٹائزیشن کا انقلابی کردار ہے۔