میٹا کے اے آئی اسسٹنٹ سے واٹس ایپ صارفین پریشان

اس نئے فیچر کو اپنی مرضی سے غیرفعال نہیں کر سکتے،صارفین کی شکایت

پیر 28 اپریل 2025 15:47

نیویارک(اُردو پوائنٹ اخبارتازہ ترین - این این آئی۔ 28 اپریل2025ء)معروف ٹیکنالوجی کمپنی میٹا کے اے آئی اسسٹنٹ نے واٹس ایپ صارفین کو پریشان کر دیا۔برطانوی نشریاتی ادارے کی رپورٹ کے مطابق دنیا بھر سے اور بالخصوص یورپ کے بہت سے واٹس ایپ صارفین یہ شکایت کر رہے ہیں کہ وہ اس نئے فیچر کو اپنی مرضی سے غیرفعال نہیں کر سکتے۔صارفین کا کہنا تھا کہ واٹس ایپ پر چیٹ انٹرفیس میں نیلے رنگ کا ایک دائرہ یعنی میٹا کا اے آئی اسسٹنٹ مستقل نظر آتا رہتا ہے جس کے باعث صارفین کو ان کی خود مختاری اور کنٹرول پر تشویش پیدا ہوتی ہے۔

صارفین کی شکایت یہ ہے کہ میٹا کا دعوی ہے کہ اس اے آئی اسسٹنٹ فیچر کو صارفین اپنی مرضی سے استعمال کر سکتے ہیں لیکن اس کے باوجود بھی یہ چیٹ انٹرفیس میں خود بخود ظاہر ہوتا ہے اور اسے غیر فعال نہیں کیا جا سکتا۔

(جاری ہے)

صارفین کا یہ بھی کہنا تھا کہ اگرچہ یہ اے آئی اسٹنٹ فیچر سوالات کے جواب دے سکتا ہے، تصاویر بنا سکتا ہے اور معلومات فراہم کر سکتا ہے لیکن پھر بھی بہت سے صارفین کو اس کا خود بخود چیٹ انٹرفیس میں ظاہر ہونا ان کی پرائیویسی کی دخل اندازی لگ رہا ہے۔

صارفین نے یہ نشاندہی بھی کی کہ اے آئی ماڈلز کو تربیت دینے والا کچھ ڈیٹا ذاتی معلومات یا پائریٹڈ مواد سے حاصل کردہ ہو سکتا ہے جس سے ڈیٹا کے غلط استعمال کا خدشہ پیدا ہوتا ہے۔اس حوالے سے کچھ ماہرین کا کہنا تھا کہ کسی کو بھی اے آئی استعمال کرنے کی ضرورت نہیں ہونی چاہیے اور میٹا کے اے آئی ماڈلز کو تربیت دینے کے لیے استعمال ہونے والا ڈیٹا صارف کی رازداری سے سمجھوتہ کر سکتا ہے۔