پاکستان اور بھارت کشیدگی نہ بڑھائیں،دونوں ممالک مل بیٹھ کر مسئلے کا حل نکالیں،امریکہ

امریکہ نے دونوں ممالک کو پرامن رہنے کا مشورہ دیدیا، پاک بھارت میں بڑھتے تناو پر گہری نظر ہے،امریکی وزیر خارجہ مارکو روبیو پاکستان اور بھارت کے وزرا خارجہ سے آج یا کل بات کریں گے، ترجمان امریکی محکمہ خارجہ کی میڈیا کو بریفنگ

فیصل علوی بدھ 30 اپریل 2025 10:42

واشنگٹن(اردوپوائنٹ اخبار تازہ ترین۔30اپریل 2025)امریکہ کا کہنا ہے کہ پاکستان اور بھارت کشیدگی نہ بڑھائیں،دونوں ممالک مل بیٹھ کر مسئلے کا حل نکالیں،امریکہ نے دونوں ممالک کو پرامن رہنے کا مشورہ دیدیا،پاک بھارت مسئلے پر دیگر ممالک کے رہنماوں سے بھی رابطہ کریں گے،امریکی محکمہ خارجہ کی ترجمان ٹیمی بروس نے پریس بریفنگ میں کہا کہ کشمیر کی صورتحال پر پاکستان اور بھارت دونوں سے رابطہ کیا جا رہا ہے اور ان سے کہا جارہا ہے کہ کشیدگی میں اضافہ نہ کریں۔

پاک بھارت میں بڑھتے تناو پر گہری نظر ہے۔ ٹرمپ انتظامیہ دونوں ممالک کے ساتھ مسلسل رابطے میں ہے اور دونوں حکومتوں کو کشیدگی کم کرنے کا کہا ہے۔امریکہ کی پہلگام میں پیش آنے والے واقعہ پر نظرہے۔ دنیا پاکستان اور بھارت کی صورتحال کو دیکھ رہی ہے۔

(جاری ہے)

انہوں نے کہا کہ امریکی وزیر خارجہ مارکو روبیو پاکستان اور بھارت کے وزرا خارجہ سے آج یا کل بات کریں گے۔

وہ دیگر قومی رہنماوں اور وزرا خارجہ کی بھی حوصلہ افزائی کررہے ہیں کہ وہ بھی اس مسئلہ پر پاکستان اور بھارت سے رابطہ کریں۔امریکہ صورتحال پر نظر رکھے ہوئے ہے۔ پاکستان اور بھارت کی حکومتوں سے نہ صرف وزیر خارجہ کی سطح پر بلکہ کئی سطح پر رابطہ ہے اور فریقوں سے کہا جارہا ہے کہ وہ ذمہ دارانہ حل نکالیں کیونکہ دنیا یہ صورتحال دیکھ رہی ہے۔

پریس بریفنگ کے دوران امریکی محکمہ خارجہ کا مزید کہنا تھا کہ امریکی قیادت نے خطے میں کشیدگی کم کرنے کا عزم کیا ہے اور فریقین کو افہام و تفہیم کے ذرئعے مسئلے کا حل نکالنے کا مشورہ دیا ہے۔ اس معاملے پر روزانہ کی بنیاد پر اقدامات کئے جا رہے ہیں۔پاکستان اور بھارت میں اپنے ہم منصب سے وزیر براہ راست بات کر رہے ہیں اور توقع ہے کہ یقیناً اس کا ویسا ہی اثر ہوگا جیسا کہ وزیر دیگر لوگوں سے بات کرتے ہیں۔

ٹیمی بروس نے عالمی رہنماوں کو اس نازک صورتحال میں پاکستان اور بھارت کی قیادت کے ساتھ رابطہ کرنے کا کہا ہے۔پاکستان اور بھارت صورتحال مزید خراب نہ کریں، پاکستان اور بھارتی حکام سے جلد رابطہ کریں گے، پاکستان بھارت سے کشیدگی میں اضافہ نہ کرنے کا کہیں گے۔ان کایہ بھی کہنا تھا کہ امریکی صدر صدر ٹرمپ کی قیادت کی موجودگی میں یقیناً پاکستان اور بھارت کیلئے وہ بات چیت اہم ہے۔