بلوچستان ہائی کورٹ نے بلوچستان میں زرعی کنکشن کاٹنے اور فیڈرز بند کرنے سے کیسکو کو روک دیا

پیر 28 اپریل 2025 21:45

کوئٹہ(اُردو پوائنٹ اخبارتازہ ترین - این این آئی۔ 28 اپریل2025ء) بلوچستان ہائی کورٹ بار ایسوسی ایشن کے صدر میر عطاء اللہ لانگو نے کہا ہے کہ بلوچستان ہائی کورٹ نے بلوچستان میں زرعی کنکشن کاٹنے اور فیڈرز بند کرنے سے کیسکو کو روک دیاہے ۔ یہ بات انہوں نے اپنے ایک بیان میں کہی۔ میر عطاء اللہ لانگو نے کہا کہ بلوچستان ہائیکورٹ میں صوبے میں زرعی فیڈرز کی بجلی کاٹنے کیخلاف دائر آئینی درخواست کی سماعت جسٹس روزی خان بڑیچ اور جسٹس سردار احمد حلیمی نے کی۔

(جاری ہے)

دوران سماعت عدالت نے عبوری حکم جاری کرتے ہوئے بلوچستان میں زرعی کنکشن کاٹنے اور فیڈرز بند کرنے سے کیسکو کو روک دیا ہے ۔عدالت نے حکم دیا کہ جن ٹیوب ویلز کو سولر پینل کے پیسے نہیں ملے ان کے کنکشنز بھی نہ کاٹے جائیں، انہوں نے کہا کہ ڈویژنل بینچ نے بلوچستان میں فیڈرز پر بجلی کی فراہمی معطل کرنے پر برہمی کا اظہارکرتے ہوئے کہا ہے کہ زرعی فیڈرزپر گھریلو صارفین زیادہ ہیں بجلی بندش سے مشکلات سے ہوتی ہیں، عدالت نے ہدایت دی ہے کہ بلوچستان میں زرعی ٹیوب ویلز سولر سسٹم میں منتقلی کا عمل جلد مکمل کیا جائے، میر عطا اللہ لانگو ایڈووکیٹ نے کہا کہ بجلی منقطع کرنے سے بلوچستان میں مختلف فصل اور باغات تباہ ہورہے ہیں۔