بونیر میں بجلی کے 30 میٹرز میں اچانک آگ لگ گئی، خاتون جاں بحق، 4 افراد زخمی

متعدد گھروں میں فریج، اسٹیبلائزر، واشنگ مشینیں اور پنکھے جیسے دیگر ہوم اپلائنسز بھی جل گئے

ساجد علی منگل 29 اپریل 2025 14:55

بونیر ( اُردو پوائنٹ اخبارتازہ ترین۔ 29 اپریل 2025ء ) صوبہ خیبرپختونخواہ کے علاقہ بونیر میں پیر بابا میں 11 ہزار وولٹ بجلی کی مین لائن گھروں کو جانے والی تار پر گرنے کے باعث گھروں میں لگے بجلی میٹرز جل گئے اس دوران ایک خاتون جاں بحق اور 4 افراد زخمی بھی ہوئے۔ میڈیا رپورٹس کے مطابق بونیر کے علاقے پیر بابا میں ہائی وولٹیج مین لائن گرنے سے 30 گھروں میں بجلی کے تاروں اور میٹروں میں آگ لگ گئی، ریسکیو حکام کا کہنا ہے کہ کرنٹ گھروں میں پھیلنے سے ایک خاتون جاں بحق، 3 خواتین اور ایک بچہ زخمی ہوا، واقعے کی اطلاع ملتے ہی ریسکیو ٹیموں نے موقع پر پہنچ کر امدادی سرگرمیوں کا آغاز کردیا اور زخمیوں کو علاج کے لیے تحصیل ہیڈ کوارٹر ہسپتال پیر بابا منتقل کردیا گیا، واقعے کے بعد اسسٹنٹ کمشنر ناصر علی نے متاثرہ گھروں کا دورہ کیا جہاں انہوں نے حکومت کی جانب سے متاثرین کو ہر ممکن مدد فراہم کرنے کی یقین دہانی کرائی۔

(جاری ہے)

شہریوں کی طرف سے بتایا گیا ہے کہ حضرت پیر بابا کے قبرستان میں موضع افسر آباد کے لیے نصب 200 کے وی ٹرانسفارمر کا یونٹ ٹوٹنے کی وجہ سے مین لائن کی تاریں گھروں کو جانے والی ایل ٹی لائن پر گریں تھی، کرنٹ کی وجہ سے متعدد گھروں میں فریج، اسٹیبلائزر، واشنگ مشینیں اور پنکھے جیسے دیگر ہوم اپلائنسز جل گئے کیوں کہ ہائی وولٹیج مین لائن گرنے کے بعد بجلی فوری طور پر منقطع نہ ہونے کی وجہ سے کرنٹ گھروں میں پھیل گیا، میٹرز میں آگ لگتے ہی شہریوں نے پی ایم ٹی کی طرف دوڑ لگائی اور ڈنڈوں کی مدد سے ٹوٹی تاروں کو نیچے گرا دیا، جس کی وجہ سے مزید نقصان نہیں ہوا تاہم اس واقعے کے بعد علاقے میں شدید خوف و ہراس کی صورتحال پیدا ہوگئی۔