کراچی میں بزرگ خاتون کے اندھے قتل کا معمہ حل، دو ملزمان گرفتار

خاتون بارہ دری فلیٹ میں اکیلی رہتی تھی، آسان ہدف سمجھ کر چوری کا منصوبہ بنایا، ملزمان

بدھ 30 اپریل 2025 22:05

کراچی(اُردو پوائنٹ اخبارتازہ ترین - این این آئی۔ 30 اپریل2025ء)انویسٹی گیشن پولیس نے بارہ دری اپارٹمنٹ میں عمر رسیدہ خاتون کے اندھے قتل کا معمہ حل کرتے ہوئے دو ملزمان کو گرفتار کر لیا ہے۔ایس ایس پی انویسٹی گیشن علینہ راجپر کے مطابق کارروائی کے دوران گرفتار ملزمان کی شناخت آصف عرف پھلا اور رحمان عرف ٹڈی کے ناموں سے ہوئی ہے۔

(جاری ہے)

پولیس کے مطابق ملزمان نے اعتراف کیا ہے کہ مقتولہ فلیٹ میں اکیلی رہائش پذیر تھیں، جس بنا پر انہوں نے انہیں آسان ہدف سمجھ کر چوری کا منصوبہ بنایا۔

ملزمان واردات کے روز فلیٹ میں چوری کی نیت سے داخل ہوئے، جہاں مقتولہ کی مزاحمت پر انہوں نے خاتون کو قابو میں کر کے ان کے ہاتھ پائوں باندھ دیئے اور منہ پر کپڑا لپیٹ کر قتل کر دیا۔ملزمان واردات کے بعد فلیٹ سے کچھ سونے، چاندی اور پیتل کے آرٹیفیشل زیورات کے علاوہ تقریبا ستر ہزار روپے نقد رقم چوری کر کے فرار ہو گئے تھے۔ایس ایس پی انویسٹی گیشن علینہ راجپر کا کہنا ہے کہ شواہد کی بنیاد پر مزید تفتیش جاری ہے اور ملزمان سے مزید انکشافات کی توقع ہے۔