چوہدری سالک حسین کامزدوروں کی قربانیوں اور کامیابیوں کو خراج تحسین

حکومت مزدوروں ، محنت کشوں کیلئے منصفانہ اجرت ، کام کے حالات کو بہتر بنانے، ہنر مندی اور استعداد کار میں اضافے کیلئے پر عزم ہے ،پیغام

بدھ 30 اپریل 2025 22:35

اسلام آباد(اُردو پوائنٹ اخبارتازہ ترین - این این آئی۔ 30 اپریل2025ء) وفاقی وزیر سمندرپار پاکستانی چوہدری سالک حسین نے مزدوروں کی قربانیوں اور کامیابیوں کو خراج تحسین پیش کرتے ہوئے کہاہے کہ حکومت مزدوروں اور محنت کشوں کیلئے منصفانہ اجرت ، کام کے حالات کو بہتر بنانے، ہنر مندی اور ان کی استعداد کار میں اضافے کیلئے پر عزم ہے۔چوہدری سالک حسین نے یوم مزدور کے موقع پر پیغام میں کہاکہ میں پاکستان کے ان محنتی اور انتہائی جفا کش مرد وخواتین کا تہہ دل سے شکر گزار ہوں اور دل کی گہرائیوں سے احترام کرتا ہوں جو ہماری ملکی معیشت میں ریڑھ کی ہڈی کی حیثیت رکھتے ہیں۔

انہوںنے کہاکہ یکم مئی، مضبوط اور خوشحال پاکستان کی تعمیر میں ہماری لیبر فورس کے انمول اور بے مثال کردار کی تجدید عہد کا دن ہے۔

(جاری ہے)

وفاقی وزیرنے کہاکہ ہمارے کارکنان خواہ کارخانوں میں ہوں، کھیتوں ، دفاتر یا تعمیراتی جگہوں پر ہوں غیر متزلزل عزم و استقلال، لگن اور دیانتداری کے ساتھ مصروف عمل ہیں، ان کی مخلصانہ کوششیں پر عزم ، پائیدار اور پر امید پاکستان کے جذبے کا ثبوت ہیں۔

چوہدری سالک حسین نے کہاکہ ہم اپنے مزدوروں کی قربانیوں اور کامیابیوں کو خراج تحسین پیش کرتے ہیں، یہ ہمارا فرض ہے کہ ہم ان کے وقار، حقوق اور فلاح و بہبود کو یقینی بنانے کے لیے اپنے بھر پور عزم کا اعادہ کریں۔ وفاقی وزیرنے کہاکہ حکومت مزدوروں اور محنت کشوں کیلئے منصفانہ اجرت ، کام کے حالات کو بہتر بنانے، ہنر مندی اور ان کی استعداد کار میں اضافے کے لئے پر عزم اورثابت قدم ہے۔انہوںنے کہاکہ آئیے ہم مل کر، اتحاد و یگانگت کے ساتھ، ایک ایسے مستقبل کی طرف بڑھیں جہاں ہر کارکن کی قدر اور عزت ہو اس کا مستقل محفوظ خوشیوں سے بھر پور اور بااختیار ہو،اللہ ہماری قوم اور ہمارے کارکنوں کو امن، خوشحالی اور ترقی عطا فرمائے،آمین۔