فیصل آباد،ماہِ اپریل میں ریسکیو 1122 کنٹرول روم کو 13292 ایمرجنسی کالز موصول

جمعرات 1 مئی 2025 18:44

فیصل آباد (اُردو پوائنٹ اخبارتازہ ترین - آن لائن۔ 01 مئی2025ء) ماہِ اپریل میں ریسکیو 1122 کنٹرول روم کو 13292 ایمرجنسی کالز موصول ہوئیں۔ ریسکیو ٹیمز نے بروقت موقع پر پہنچ کر 2836 روڈ ٹریفک ایکسیڈنٹ، 8778 میڈیکل، 309 آگ لگنے، 360 کرائم، 06 ڈوبنے، 07 عمارت گرنے، 02 سلنڈر پھٹنیاور 902 دیگر متفرق ایمرجنسیز پر رسپانس کیا. انسانی خدمت کے ساتھ ساتھ 92 کالز پر پرندوں اور جانوروں کو بھی ریسکیو کیا گیا۔

گندم کی فصل میں آگ لگنے کے حوالے سے ڈسٹرکٹ ایمرجنسی آفیسر کا کہنا تھا کہ حالیہ دنوں میں گندم کی فصل میں آگ لگنے کے واقعات میں نمایاں آضافہ ہوا ہے۔ ماہِ اپریل میں 50 سے زائد گندم کے کھیتوں میں آگ لگنے کے واقعات پیش آئے ریسکیو فائر فائٹرز نے بروقت موقع پر پہنچ کر آگ پر قابو پاتے ہوئے سینکڑوں ایکڑ رقبے کو محفوظ بنایا آگ کو مزید پھیلنے سے روکا۔

(جاری ہے)

احتیاطی تدابیر اختیار نہ کرنے کی صورت میں گندم میں لگنے والی آگ سے فصلوں اور معاش کو کافی نقصان پہنچ سکتا ہے۔ خدانخواستہ آگ لگنے کی صورت میں فوری ریسکیو 1122 ایمرجنسی ہیلپ لائن پر کال کریں۔ کسانوں کو چاہیے کہ جب فصل پک کر تیار ہو جائے تو فصل کے قریب سگریٹ اور حقہ نوشی سے مکمل اجتناب کیا جائے۔ زرعی آلات اور مشینری کی باقاعدگی سے مرمت کروائی جائے تاکہ کسی قسم کی سپارکنگ سے بچا جائے۔ احتیاطی تدابیر اختیار کرنے سے گندم کی فصل میں آگ لگنے کے خطرے کو نمایاں طور پر کم کر سکتے ہیں اور اپنی فصلوں، املاک اور معاش کی حفاظت کر سکتے ہیں۔