وفاقی وزیرڈاکٹرمصدق ملک کی قطری ہم منصب، یورپی کمیشن کے ڈائریکٹر برائے سرکلر اکانومی اور جنیوا میں اقوامِ متحدہ کے ماحولیاتی اداروں کے نمائندگان سے اعلیٰ سطحی ملاقاتیں

اسلام آباد (اُردو پوائنٹ اخبارتازہ ترین - اے پی پی۔ 02 مئی2025ء) وفاقی وزیر موسمیاتی تبدیلی و ماحولیاتی رابطہ ڈاکٹر مصدق ملک نے قطر کے وزیر برائے ماحولیات و موسمیاتی تبدیلی ڈاکٹر عبداللہ بن عبدالعزیز، یورپی کمیشن کے ڈائریکٹر برائے سرکلر اکانومی کیوبانو ڈورڈیا اور جنیوا میں اقوامِ متحدہ و دیگر ماحولیاتی اداروں کے نمائندگان سے اعلیٰ سطحی ملاقاتیں کیں۔

وزارت ماحولیاتی تبدیلی سے جمعہ کو جاری بیان کے مطابق ان ملاقاتوں کا مقصد ماحولیاتی اور موسمیاتی چیلنجز کے حوالے سے دوطرفہ اور کثیرالملکی تعاون کو فروغ دینا تھا۔ ڈاکٹر عبداللہ بن عبدالعزیز کے ساتھ ملاقات میں وفاقی وزیر ڈاکٹر مصدق ملک نے ماحولیات کے تحفظ، موسمیاتی تبدیلی سے ہم آہنگی، جنگلی حیات کے تحفظ، صاف توانائی اور کاربن مارکیٹ کی ترقی جیسے شعبوں میں تعاون کو مزید وسعت دینے پر بات چیت کی۔

(جاری ہے)

دونوں وزراء نے پیٹروکیمیکل ری سائیکلنگ ٹیکنالوجیز، کاربن ٹریڈنگ/آف سیٹ اور علاقائی کاربن مارکیٹ کے نظام جیسے شعبوں میں باہمی مفاد پر مبنی مشترکہ اقدامات کے لئے اپنے عزم کا اعادہ کیا۔ کیوبانو ڈورڈیا کے ساتھ ملاقات کے دوران ڈاکٹر مصدق ملک نے سرکلر اکانومی اور پائیدار ترقی کے اصولوں سے پاکستان کی بڑھتی ہوئی وابستگی پر روشنی ڈالی۔

انہوں نے اس بات پر زور دیا کہ عالمی فریم ورک کو ترقی پذیر ممالک کے نقطہ نظر کو بہتر طریقے سے شامل کرنا چاہئے۔ انہوں نے پاکستان کی گرین اکانومی کی جانب منتقلی کے لئے گرین کلسٹر کی ترقی اور اختراع پر مبنی شراکت داریوں کی کوششوں کو اجاگر کیا۔ جنیوا میں اقوامِ متحدہ اور ماحولیاتی تنظیموں کے نمائندگان سے ملاقاتوں میں پاکستان کی جانب سے ماحولیاتی تحفظ، موسمیاتی مالیات اور صاف توانائی کے لئے تعاون بڑھانے پر بات چیت کی گئی۔

ڈاکٹر مصدق ملک نے ترقی پذیر ممالک کو موسمیاتی انصاف کی فراہمی اور ٹیکنالوجی کی منتقلی میں عالمی برادری کے کردار پر زور دیا۔ ملاقاتوں میں اس امر پر زور دیا گیا کہ پاکستان بین الاقوامی شراکت داریوں سے فائدہ اٹھا کر اپنی صلاحیتوں کو بڑھانے، صاف ٹیکنالوجی تک رسائی حاصل کرنے اور گرین سیکٹرز میں نجی شعبے کے اشتراک سے معاشی تعاون کو فروغ دینے کے لئے پُرعزم ہے۔

قطری، یورپی اور اقوامِ متحدہ کے فریقین نے پاکستان کے متحرک ماحولیاتی وژن کو سراہا اور عالمی پائیداری کے اہداف کے حصول میں اس کے تعمیری کردار کو خوش آئند قرار دیا۔ وفاقی وزیر ڈاکٹر مصدق ملک نے اس عزم کا اعادہ کیا کہ پاکستان بین الاقوامی شراکت داروں کے ساتھ قریبی تعاون جاری رکھے گا تاکہ مشترکہ ماحولیاتی چیلنجز سے نمٹا جاسکے، سبز معیشت کی جانب منتقلی کو تیز کیا جاسکے اور عالمی سطح پر موسمیاتی اقدامات کے پلیٹ فارمز پر بامعنی کردار ادا کیا جاسکے۔