بھارت نے پاکستان پر حملہ کرنے کی کوشش کی تو منہ توڑ جواب دیں گے ‘ راجہ پرویزاشرف

لاہور/ سمبڑیال(اُردو پوائنٹ اخبارتازہ ترین - این این آئی۔ 02 مئی2025ء)سابق وزیر اعظم وپاکستان پیپلز پارٹی وسطی پنجاب کے صدر راجہ پرویز اشرف نے کہا ہے کہ بھارت نے پاکستان پر حملہ کرنے کی کوشش کی تو منہ توڑ جواب دیں گے ، مادر وطن کی حفاظت کے لئے ہر پاکستانی سینہ سپر ہے، اپنی آزادی کا دفاع ہر حد تک کریں گے ،پوری قوم چٹان کی طرح مسلح افواج کے ساتھ کھڑی ہے،ہندوستان روایتی عیاری اور بدنیتی سے پاکستان کو بدنام کر رہا ہے۔

وہ پیپلز پارٹی سمبڑیال کے زیر اہتمام مقامی شادی ہال میں جنرل سیکرٹری سید حسن مرتضی ،آصف بشیر بھاگٹ،اعجاز سمہ،امتیاز صفدر وڑائچ،راحیل کامران چیمہ،ملک طاہر،رانا عبدالعزیز احسن گھمن اور شہباز خان کیساتھ پریس کانفرنس سے خطاب کر رہے تھے۔اس موقع پر عبدالرزاق سلیمی،اظہر ڈیال،ریاض شاہ،نوید گورسی،قمر خان،ارشاد سندھو،ملک ندیم،کاشف گجر،عمران سرویا،ودود ڈار،خالد باجوہ اور دیگر بھی موجود تھے۔

(جاری ہے)

راجہ پرویز اشرف نے اس موقع پر اعلان کیا کہ پیپلز پارٹی نے راحیل کامران چیمہ کو امیدوار پی پی 52سیالکوٹ کے لئے نامزد کیا ہے جبکہ انتخابی مہم کے انچارج ڈویژنل صدر گوجرانوالہ آصف بشیر بھاگٹ ہوں گے ۔سابق وزیر اعظم نے کہا کہ پیپلز پارٹی نے ہمیشہ ہر طبقے کی نمائندگی کی ہے،یہ الیکشن بھر پور طریقے سے لڑیں گے۔سیالکوٹ کا ضمنی الیکشن جیتنے کے لئے پوری منصوبہ بندی سے لڑ رہے ہیں،یقین ہے کہ ملحقہ اضلاع اور تحصیلوں کی تنظیمی اسے اپنا الیکشن سمجھ کر لڑیں گے ۔

راجہ پرویز اشرف نے کہا کہ ہمارا منشور ہی عوام کی خدمت اور انکے مسائل حل کرنا ہے ،راحیل کامران چیمہ جیت کر اہل سیالکوٹ کے مسائل حل کریں گے ۔بھارت کی طرف سے پاکستان پر حملے کے سوال پر راجہ پرویز اشرف نے کہا کہ یہ قوم وقت پڑنے پر سیسہ پلائی دیوار بن جاتی ہے ،یقین ہے کہ بھارت کوئی ایڈونچر کرنے کی جرات نہیں کرے گا،پاکستان خود دہشت گردی کا نشانہ ہے وہ کیسے ایسے کسی واقعہ میں ملوث ہو سکتا ہے۔

جنرل سیکرٹری پی پی وسطی پنجاب سید حسن مرتضیٰ نے کہا کہ یہ ڈبیٹ انڈیا میں شروع ہو چکی ہے کہ پہلگام ڈرامہ میں کوئی حقیقت نہیں۔بعد ازاں پیپلز پارٹی کے رہنما راجہ پرویز اشرف اور حسن مرتضی کی قیادت میں پی پی 52 سیالکوٹ سے سابق ٹکٹ ہولڈر زین گھمن کی وفات پر انکے اہلخانہ سے تعزیت کرنے گئے اور فاتحہ خوانی کی ۔