آج کی دنیا کا سب سے عظیم معلم اہلِ غزہ ہی: علامہ سید جواد نقوی

ٹ*آج دنیا کے ہر تعلیمی ادارے کو اہلِ غزہ سے سیکھنے کی ضرورت ہے،خطاب

جمعرات 1 مئی 2025 19:45

لاہور (اُردو پوائنٹ اخبارتازہ ترین - آن لائن۔ 01 مئی2025ء) ایک جانب جہاں دنیا بھر میں یکم مئی کو یومِ مزدور کے طور پر منایا جاتا ہے، وہیں حوزہ ہائے علمیہ میں یہ دن یومِ معلم کے عنوان سے بھی مخصوص ہے اس عظیم ہستی کے احترام میں جو نسلوں کی فکری آبیاری کرتا ہے، جو انسانیت کو شعور، کردار اور مقصد عطا کرتا ہے۔اسی مناسبت سے جامعہ عروة الوثقیٰ کے شعبہ خواتین، جامعہ اٴْمّ الکتاب میں یومِ معلم کی پٴْروقار تقریب بعنوان مجاہدین غزہ معلمین انسانیت منعقد ہوئی۔

اس موقع پر علامہ سید جواد نقوی نے اپنے خطاب میں کہا کہ آج کی دنیا کے سب سے عظیم اور بہترین معلم، اہلِ غزہ ہیں۔غزہ کی مائیں، غزہ کی بیٹیاں، غزہ کے مجاہد، اور غزہ کے معصوم بچے یہ سب وہ معلم ہیں جنہوں نے صبر، استقامت، شجاعت، مزاحمت، بصیرت اور ایثار کا عملی درس دنیا کو دیا ہے۔

(جاری ہے)

مزید ان کا کہنا تھا کہ آج دنیا کے ہر تعلیمی ادارے، ہر مدرسے، ہر جامعہ، اور ہر فکری ادارے کو چاہیے کہ وہ غزہ اور اہلِ غزہ کو اپنا رول ماڈل بنائیں۔

وہ تعلیمی ادارے جو صرف ڈگری دیتے ہیں، انہیں غزہ سے وہ جذبہ لینا ہوگا جو ضمیر جگاتا ہے، جو انسان بناتا ہے، اور جو حق و باطل کے بیچ واضح لکیر کھینچ دیتا ہے۔مزید انہوں نے کہا کہ ہمارے معاشرے میں جو نظامِ تعلیم رائج ہے، وہ "نصاب محور" ہے۔ ہم اپنے بچوں کو ان ممالک کے نظاموں کے مطابق تعلیم دلوانے کو ترجیح دیتے ہیں جنہیں ہم ترقی یافتہ یا پسندیدہ سمجھتے ہیں۔ چنانچہ ہم نصاب اور کتاب کو معیار بنا لیتے ہیں۔ لیکن الہی نظامِ تعلیم میں معاملہ اس کے برعکس ہی؛ وہاں نصاب اور کتاب کی حیثیت ثانوی ہے، اصل بنیاد معلم ہے۔ معلم تربیت یافتہ ہو تو وہ فرد کو سماج کا مؤثر اور باکردار انسان بناتا ہے، اس کی تربیت کرتا ہے، اور اسے فکری، اخلاقی اور روحانی ارتقاء کے سفر پر گامزن کرتا ہے۔