ریلوے ہیڈکوارٹر مالی سال 25-2024 میں مقررہ آمدنی کا ہدف حاصل کرنے میں ناکام

ہفتہ 12 جولائی 2025 20:56

لاہور (اُردو پوائنٹ اخبارتازہ ترین - آن لائن۔ 12 جولائی2025ء) پاکستان ریلوے ہیڈکوارٹر مالی سال 25-2024 کے اختتام پر اپنی متوقع آمدنی کا ہدف حاصل کرنے میں ناکام رہا۔ دستیاب مالیاتی اعدادوشمار کے مطابق ریلوے کو 1 کھرب 10 ارب روپے کا آمدنی کا ہدف دیا گیا تھا تاہم ادارہ صرف 93 ارب 38 کروڑ روپے آمدنی ہی حاصل کر سکا، جو ہدف سے 16 ارب 61 کروڑ روپے کم ہے۔

ریلوے نے رواں مالی سال کے دوران کئی بار کرایوں میں اضافہ بھی کیا، تاہم اس کے باوجود آمدنی میں نمایاں بہتری نہ آ سکی۔

(جاری ہے)

تفصیلات کے مطابق مسافروں کے ذریعے آمدنی کا ہدف 56 ارب 11 کروڑ روپے مقرر تھا، جبکہ حقیقت میں صرف 48 ارب 90 کروڑ روپے آمدنی حاصل ہو سکی۔اسی طرح گڈز سیکٹر کے لیے 35 ارب 25 کروڑ روپے کا ہدف مقرر کیا گیا تھا مگر ریلوے صرف 31 ارب 72 کروڑ روپے ہی حاصل کر سکا۔

سنڈری سیکٹرز میں بھی آمدنی کی صورتحال مایوس کن رہی۔ریلوے ذرائع کے مطابق آمدنی میں کمی کی بڑی وجوہات میں انفراسٹرکچر کی کمزوری، سروسز میں غیر یقینی صورتحال، اور جدید نظام کی عدم دستیابی شامل ہیں۔ محکمہ ریلوے کے اعلیٰ حکام آئندہ مالی سال کے لیے مؤثر اصلاحاتی اقدامات اور نجی شعبے سے شراکت داری کے نئے منصوبوں پر غور کر رہے ہیں۔