یومِ امید ہمیں یاد دلاتا ہے کہ ہر اندھیرے کے بعد روشنی ضرور آتی ہے، گورنرسندھ

ہفتہ 12 جولائی 2025 21:03

کراچی (اُردو پوائنٹ اخبارتازہ ترین - اے پی پی۔ 12 جولائی2025ء) گورنر سندھ کامران خان ٹیسوری نے بین الاقوامی یومِ امید کے موقع پر اپنے پیغام میں کہا ہے کہ یومِ امید ہمیں یاد دلاتا ہے کہ ہر اندھیرے کے بعد روشنی ضرور آتی ہے۔ہفتہ کو گورنر ہائوس سے جاری اعلامیہ کے مطابق گورنر سندھ نے کہا کہ گورنر ہائوس میں نصب ’’امید کی گھنٹی‘‘ ایک ایسا پلیٹ فارم ہے جو عوامی مسائل کے فوری حل کے لیے روزانہ کی بنیاد پر کام کر رہا ہے۔

(جاری ہے)

انہوں نے اسے عوام کے دلوں میں امید جگانے کی عملی مثال قرار دیا۔ انہوں نے اس دن کو انسان دوستی، شفقت اور باہمی یکجہتی کے فروغ کا ذریعہ قرار دیتے ہوئے کہا کہ ہمیں صرف امید کی بات نہیں کرنی بلکہ عملی اقدامات سے امید کو زندہ رکھنا ہے۔ گورنرسندھ کامران خان ٹیسوری نے واضح کیا کہ امید کی گھنٹی کا بنیادی مقصد عوام کو براہِ راست رسائی دینا اور فوری ریلیف فراہم کرنا ہے۔ انہوں نے مزید کہا کہ معاشرتی ہم آہنگی اور باہمی ہمدردی ہی امید کا حقیقی راستہ ہے۔