کورنگی: جھونپڑیوں میں پولیس کے مبینہ چھاپے کے دوران ایک ماہ کی بچی جاں بحق

پولیس اہلکاروں نے خواتین کے ساتھ ہاتھا پائی کی اس دوران بچی نیچے گری، ورثا کا الزام

جمعرات 1 مئی 2025 22:00

کراچی(اُردو پوائنٹ اخبارتازہ ترین - این این آئی۔ 01 مئی2025ء)کراچی کے علاقے کورنگی عوامی کالونی میں جھونپڑیوں میں پولیس کے مبینہ چھاپے کے دوران ایک ماہ کی بچی جاں بحق ہوگئی۔اہل خانہ کے مطابق گذشتہ روز عوامی کالونی پولیس نے جھونپڑیوں میں ملزمان کی گرفتاری کیلئے چھاپہ مارنے آئی تھی ہاتھا پائی کے دوران ایک ماہ کی بچی مبینہ طور پر نیچے گرنے سے جاں بحق ہوگئی۔

ورثا بچی کی لاش لیکر ایس ایس پی کورنگی کے دفتر کے باہر احتجاج کرنے پہنچ گئے۔

(جاری ہے)

ورثا نے الزام لگایا کہ گذشتہ روز عوامی کالونی پولیس نے جھونپڑیوں میں چھاپہ مارنے آئی پولیس اہلکاروں نے خواتین سے ہاتھا پائی کی ایک ماہ کی بچی مبینہ طور پر ہاتھا پائی کے دوران نیچے گرگئی تھی۔لواحقین نے مطالبہ کیا کہ ایس ایچ او عوامی کالونی اور پولیس پارٹی کیخلاف کارروائی کی جائے۔

پولیس ذرائع نے بتایا کہ عوامی کالونی تھانے کی تفتیشی ٹیم اسٹریٹ کرائم کی وارداتوں میں ملوث ملزم کی گرفتاری کے لیے گئی تھی عوامی کالونی تھانے میں ملزم کے خلاف شہری کی مدعیت میں مقدمہ درج ہے۔ڈی ایس پی کورنگی اسلم جوئیہ کے مطابق مظاہرین کے الزامات پر تحقیقات کی یقین دہانی کروادی ہے، ایس آئی او عوامی کالونی اکبر غوری کو معطل کرکے شامل تفتیش کرلیا گیا ہے۔