مہنگائی کی ہفتہ وار شرح میں اضافہ ہو گیا

ایک ہفتے کے دوران انڈے، چکن، ایل پی جی، چینی سمیت 12 اشیاء مزید مہنگی ہو گئیں

محمد علی جمعہ 2 مئی 2025 18:05

لاہور(اُردو پوائنٹ اخبارتازہ ترین۔ 02 مئی2025ء) مہنگائی کی ہفتہ وار شرح میں اضافہ ہو گیا، ایک ہفتے کے دوران انڈے، چکن، ایل پی جی، چینی سمیت 12 اشیاء مزید مہنگی ہو گئیں
۔ تفصیلات کے مطابق ملک میں ہفتہ وار بنیادوں پر مہنگائی کی مجموعی شرح میں 0.15 فیصد اضافہ ریکارڈ کیا گیا جبکہ سالانہ بنیادوں پر مہنگائی کی مجموعی شرح منفی 2.41 فیصد رہی۔ ادارہ شماریات کے مطابق ایک ہفتے کے دوران 12 اشیا ء کی قیمتوں میں اضافہ، 11 اشیا ء کی قیمتوں میں کمی جبکہ 28 اشیا ء کی قیمتیں مستحکم رہیں۔

مہنگی ہونے والی اشیا ء میں انڈے سرفہرست رہے جو فی درجن 13 روپے 5 پیسے مہنگے ہوئے جبکہ برائلر مرغی کی قیمت میں 7 روپے 12 پیسے فی کلو اضافہ ریکارڈ کیا گیا۔ اسی طرح گھریلو ایل پی جی کا سلنڈر33 روپے 75 پیسے مہنگا ہوا۔

(جاری ہے)

دیگر مہنگی ہونے والی اشیا ء میں بریڈ، کیلے، دال مونگ، چینی، چاول، بیف اور لہسن شامل ہیں۔ رپورٹ کے مطابق لہسن کی قیمت میں 7 روپے 29 پیسے فی کلو اضافہ ہوا۔دوسری جانب سستی ہونے والی اشیا ء میں پیاز، ٹماٹر، آٹے کا 20 کلو تھیلا، دال مسور، گھی اور چنے شامل ہیں۔ پیاز 2 روپے 87 پیسے فی کلو اور ٹماٹر 2 روپے 5 پیسے فی کلو سستے ہوئے۔ادارہ شماریات کے مطابق مٹن، تازہ دودھ، چائے اور دیگر اشیا ء سمیت 28 آئٹمز کی قیمتوں میں کوئی رد و بدل نہیں ہوا۔