خیبرپختونخوا، ایم پاکس کے کیسز بڑھنے کے باعث جمرود کے علاقے میں اسمارٹ لاک ڈاؤن نافذ

فیصلے کا مقصد کمیونٹی میں وائرس کی مزید منتقلی کو روکنا ہے،ضلعی انتظامیہ نے تمام داخلی اور خارجی راستوں کو سیل کردیا

جمعہ 2 مئی 2025 18:21

خیبر (اُردو پوائنٹ اخبارتازہ ترین - این این آئی۔ 02 مئی2025ء)ضلع خیبر کی انتظامیہ نے تحصیل جمرود کے ایک علاقے میں ایم پاکس کے کیسز بڑھنے کے باعث 12 دن کا اسمارٹ لاک ڈاؤن نافذ کردیا۔خیبرپختونخوا میں اب گزشتہ تین سالوں کے دوران ایم پاکس کے کٴْل 17 کیسز ریکارڈ کیے گئے ہیں۔ زیادہ تر مریض یا تو متحدہ عرب امارات یا سعودی عرب سے آئے تھے، جہاں یہ بیماری مقامی طور پر پھیلی تھی۔

گزشتہ سال اگست میں عالمی ادارہ صحت (ڈبلیو ایچ او) نے ایم پاکس کو بین الاقوامی تشویش کی ایمرجنسی قرار دیا تھا۔ڈپٹی کمشنر ریٹائرڈ کیپٹن بلال شاہد راؤ کی طرف سے جاری کردہ نوٹی فکیشن کے مطابق خیبر کی ضلعی انتظامیہ نے غنڈی کے پمپ ہاؤس کے علاقے میں اسمارٹ لاک ڈاؤن نافذ کرتے ہوئے تمام داخلی اور خارجی راستوں کو سیل کردیا ہے۔

(جاری ہے)

رپورٹ میں کہا گیا ہے کہ اس فیصلے کا مقصد کمیونٹی میں وائرس کی مزید منتقلی کو روکنا ہے۔

رپورٹ میں کہا گیا کہ لاک ڈاؤن کے دوران صرف ضروری خدمات کو کام کرنے کی اجازت ہوگی جیسے کہ کریانہ اسٹورز، فارمیسی، جنرل اسٹورز، تندور اور ہنگامی خدمات۔رپورٹ میں حکام کے حوالے سے بتایا گیا کہ مقررہ مدت کے لاک ڈاؤن کی پابندیوں کی خلاف ورزی کرنے والے کے خلاف قانونی کارروائی کی جائے گی۔نوٹی فکیشن میں کہا گیا کہ رہائشیوں کو مشورہ دیا جاتا ہے کہ وہ صحت کی ٹیموں کے ساتھ تعاون کریں، صحت کے رہنما خطوط پر عمل کریں اور کسی بھی غیر ضروری نقل و حرکت سے گریز کریں۔