دبئی منی لانڈرنگ کیس میں 5 برس قید اور 5 لاکھ درھم جرمانے کا حکم

ہفتہ 3 مئی 2025 09:10

دبئی (اُردو پوائنٹ اخبارتازہ ترین - اے پی پی۔ 03 مئی2025ء) دبئی کی کرمنل کورٹ نے ’ابوصباح‘ کے نام سے معروف بھارتی بزنس مین کو اس کے ساتھیوں سمیت منی لانڈرنگ کا الزام ثابت ہونے پر 5 برس قید اور 5 لاکھ درھم جرمانے کا حکم دیا ہے۔امارات الیوم کے مطابق دبئی پولیس کی جانب سے جاری تفصیلات میں کہا گیا تھا کہ گزشتہ برس دسمبر میں پولیس نے منی لانڈرنگ کا کیس پراسیکیوشن کے حوالے کیا تھا جہاں سے مقدمہ کرمنل کورٹ کو بھیجا گیا جس پر جنوری سے سماعت شروع کی گئی تھی۔

ابتدائی حکم گزشتہ روز سنایا گیا۔

(جاری ہے)

منی لانڈرنگ میں ملوث افراد کے بارے میں کہا گیا ہے اس میں ایک معروف بزنس مین اور دیگر کمپنیوں کے اہم افراد شامل تھے جن پر الزام تھا کہ وہ فرضی کمپنیوں کی آڑ میں منی لانڈرنگ کرتے ہیں۔عدالتی فیصلہ سناتے وقت بعض ملزمان بیرون ملک تھے جس پر ان کی غیرموجودگی میں فیصلہ دیا گیا۔ابتدائی فیصلے میں معروف بھارتی بزنس مین کو اس کے ساتھیوں سمیت منی لانڈرنگ کا الزام ثابت ہونے پر 5 برس قید اور 5 لاکھ درھم جرمانے کا حکم سناتے ہوئے کہا گیا کہ منی لانڈرنگ سے حاصل کیے گئے 150 ملین درھم ، لیپ ٹاپس اور جرم میں استعمال ہونے والے موبائل فونز وغیرہ بحق سرکار ضبط کرلیے جائیں۔ واضح رہے کہ ابتدائی فیصلے کے خلاف اپیل دائر کردی گئی ہے۔