پابندی کا بیان،جاوید اختر کو پاکستانی فنکاروں نے آڑے ہاتھوں لے لیا

پاکستانی فنکاروں کو بھارت میں کام کرنے میں کوئی دلچسپی نہیں ، کوئی پابندی لگائے ہمیں فرق نہیں پڑتا،مشی خان

ہفتہ 3 مئی 2025 12:30

کراچی(اُردو پوائنٹ اخبارتازہ ترین - این این آئی۔ 03 مئی2025ء)بھارت کے معروف کہانی کار اور نغمہ نگار جاوید اختر کو پاکستانی فنکاروں پر بھارت میں پابندی کے حق میں بیان دینا مہنگا پڑ گیا۔اداکارہ مشی خان نے جاوید اختر کو مخاطب کرتے ہوئے کہا کہ آپ کی سوچ جان کر افسوس ہوا۔ انہوں نے جاوید اختر کو یاد دلایا کہ جب آپ پاکستان آئے تھے تو کتنی عزت دی گئی، بڑے بڑے فنکار آپ کے قدموں میں بیٹھ گئے تھے۔

اداکارہ مشی خان نے کہا کہ آج آپ کی اصلیت سامنے آگئی، آپ سخت دل اور چھوٹی سوچ کے مالک ہیں۔

(جاری ہے)

مشی خان نے کہا کہ پاکستانی فنکاروں کو بھارت میں کام کرنے میں کوئی دلچسپی بھی نہیں ہے، کوئی پابندی لگاتا ہے تو لگائے ہمیں فرق نہیں پڑتا۔اداکارہ منشا پاشا نے بھی جاوید اختر کو جواب دیتے ہوئے کہا کہ ایمانداری کی بات یہ ہے کہ قصور ہمارا ہی ہے، ہمیں اپنی عزت نفس کا خیال رکھنے کی ضرورت ہے۔یاد رہے کہ جاوید اختر نے ایک انٹرویو میں پاکستانی فنکاروں پر پابندی کی حمایت کرتے ہوئے کہا تھا کہ پاکستان نے کبھی بھارتی فنکاروں کو اہمیت نہیں دی حالانکہ نصرت فتح علی خان، غلام علی اور دیگر فنکاروں کو بھارت میں خوب پذیرائی ملی تھی۔