گزشتہ برس عمرہ زائرین کی تعداد 35 ملین سے تجاوز کرگئی، سعودی ادارہ شماریات

اندرون مملکت سے گزشتہ برس کی چوتھی سہہ ماہی میں عمرہ زائرین کی تعداد 20 لاکھ سے تجاوز کرگئی ،رپورٹ

ہفتہ 3 مئی 2025 15:44

گزشتہ برس عمرہ زائرین کی تعداد 35 ملین سے تجاوز کرگئی، سعودی ادارہ شماریات

ریاض(اُردو پوائنٹ اخبارتازہ ترین - این این آئی۔ 03 مئی2025ء)سعودی عرب کے ادارہ شماریات نے کہا ہے کہ 2023 کے مقابلے میں 2024 کی چوتھی سہہ ماہی کے دوران عمرہ زائرین کی تعداد میں 31 فیصد اضافہ ریکارڈ کیا گیا۔سعودی ٹی وی کے مطابق ادارہ شماریات نے عمرہ اعداد وشمار کے حوالے سے جاری رپورٹ میں بتایاہے کہ گزشتہ برس مملکت آنے والے عمرہ زائرین کی مجموعی تعداد 35.8 ملین رہی جوکہ سابقہ برسوں کے مقابلے میں 26 فیصد زیادہ ہے۔

(جاری ہے)

گزشتہ برس بیرون مملکت سے آنے والے مرد عمرہ زائرین میں 2.6 ملین 49 فیصد جبکہ خواتین کی تعداد 2.7 ملین 51 فیصد ریکارڈ کی گئی۔رپورٹ میں مزید کہا گیا کہ بیرون مملکت سے آنے والے 65 فیصد عمرہ ویزے پر آئے جبکہ 21 فیصد دیگر ویزوں پر مملکت پہنچے جن میں سے 11.8 فیصد ڈیجیٹل وزٹ ویزے پر تھے۔اعداد وشمار کے مطابق گزشتہ برس آنے والے 2.3 فیصد عمرہ زائرین کا تعلق خلیجی ممالک سے تھا۔اندرون مملکت سے گزشتہ برس کی چوتھی سہہ ماہی میں عمرہ زائرین کی تعداد 20 لاکھ سے تجاوز کرگئی جو کہ سال 2023 کے مقابلے میں 44.4 فیصد زیادہ ہے۔ سعودی عمرہ زائرین کی تعداد 3 لاکھ 33 ہزار جبکہ غیرملکی 18 لاکھ تھے۔