منشیات کے استعمال کا بھیانک نتیجہ، پہلا عجیب و غریب کیس

23 سالہ نوجوان کا سر 90 ڈگری کے زاویے پر مکمل جھک گیا کیونکہ اس کی گردن کمزور ہو گئی تھی‘رپورٹ

ہفتہ 3 مئی 2025 21:12

منشیات کے استعمال کا بھیانک نتیجہ، پہلا عجیب و غریب کیس

تہران (اُردو پوائنٹ اخبارتازہ ترین - آن لائن۔ 03 مئی2025ء)ایران میں ڈاکٹروں نے حال ہی میں منشیات کے استعمال کا ایک عجیب کیس رپورٹ کیا جس میں 23 سالہ نوجوان کا سر 90 ڈگری کے زاویے پر مکمل جھک گیا کیونکہ اس کی گردن کمزور ہو گئی تھی۔ایران کی اصفہان یونیورسٹی آف میڈیسن کے ڈاکٹروں نے حال ہی میں ایک 23 سالہ مرد کے کیس کی دستاویز جاری کیں جس کا سر 90 ڈگری کے زاویے پر گر گیا کیونکہ اس کی گردن کے پٹھے سر کو سہارا دینے کے قابل نہیں رہے تھے۔

(جاری ہے)

’ڈراپڈ ہیڈ سنڈروم‘ ایک سنگین طبی حالت ہے جس میں گردن کے پٹھوں میں کمزوری ہوجاتی ہے جس کی وجہ سے وہ سر کے وزن کو سہارا نہیں دے پاتی۔ یہ عام طور پر مختلف اعصابی حالات سے منسلک ہوتا ہے بشمول مائٹوکونڈریل مایوپیتھی، پیدائشی مایوپیتھی، موٹر نیورون کی بیماری یا جسمانی ساخت میں خرابی جیسے غیر معمولی طور پر بڑا سر۔لیکن ایرانی ڈاکٹروں نے حال ہی میں اس سنڈروم کے ایک غیر دستاویزی کیس کی اطلاع دی ہے کیونکہ یہ سالوں سے منشیات کے استعمال کی وجہ سے پیش آیا تھا جو کہ بہت نایاب کیس ہے۔