Live Updates

ْبھارت کی دھمکیوں کے بعد قوم کا اتحاد مسلح افواج کیلئے تقویت کا باعث ہے ‘ ہمایوں اختر خان

مسائل کے حل کیلئے بھرپور اخلاص اور نیک نیتی سے کام کر رہے ہیں ‘ سابق وفاقی وزیر کا حلقہ 97کا دورہ

اتوار 4 مئی 2025 10:55

فیصل آبا د/ تاندلیانوالہ (اُردو پوائنٹ اخبارتازہ ترین - این این آئی۔ 04 مئی2025ء) سابق وفاقی وزیر ہمایوں اختر خان نے کہا ہے کہ بھارت کی دھمکیوں کے بعد پاکستانی قوم کا اتحاد ہماری مسلح افواج کیلئے تقویت کا باعث ہے،ہم افغانستان میں روس جیسی سپرپاور کو شکست دینے اور دنیا کا نقشہ بدل کے 10اسلامی ریاستوں کا قیام ممکن بنانے والے شہداء کے وارث ہیں، اپنی خاندانی روایات کو قائم رکھتے ہوئے اپنی افواج کے شانہ بشانہ کھڑے ہو کر ہر جارحیت کا سامنا کریں گے،حلقے کے دیرینہ مسائل کے حل کے ساتھ تعمیر و ترقی کے نئے منصوبوں کیلئے بھی بھر پور کوششیں جاری ہیں اور ان شا اللہ عوام جلد مزید خوشخبریاں سنیں گے ۔

ان خیالات کا اظہا ر انہوں نے حلقہ این اے 97 کے طویل دورے کے دوران مختلف برادریوںکے عمائدین ، کسانوں اور تاجروں سے ملاقاتوں میں گفتگو کرتے ہوئے کیا ۔

(جاری ہے)

ہمایوں اختر خان نے حلقے میں انتقال کر جانے والوں کے گھروں میں جا کر اظہار تعزیت اور فاتحہ خوانی بھی کی ۔ ہمایوں اختر خان نے کہا کہ حلقے کے مسائل کے حل کیلئے بھر پو را خلاص اور نیک نیتی سے کام کر رہے ہیں اور الحمد اللہ خدا کی ذات نے اس میں کامیابیاں بھی عطا کی ہیں ۔ ہم نے حلقے میں تین سیاسی دفاتر قائم کئے ہیں جو عوام کی بھر پور معاونت میں مصروف ہیں ۔ ملاقاتوں کے دوران پاک افواج سے بھر پور یکجہتی کا اظہار کرتے ہوئے اس عزم کا اعادہ کیا گیا کہ اگر بھارت نے جارحیت کی تو ساری قوم اپنی افواج کے شانہ بشانہ لڑے گی۔