پنجاب فوڈ اتھارٹی کی ملاوٹ مافیا کیخلاف کارروائی ،8 ہزار لیٹر ملاوٹی دودھ تلف

پیر 5 مئی 2025 15:16

لاہور(اُردو پوائنٹ اخبارتازہ ترین - این این آئی۔ 05 مئی2025ء) پنجاب فوڈ اتھارٹی نے ملاوٹ مافیا کے خلاف کارروائی کر کے 8ہزار لیٹر ملاوٹی دودھ تلف کر دیا ۔ڈی جی فوڈ اتھارٹی کے حکم پر فوڈ سیفٹی ٹیموں کی جانب سے کریک ڈائون جاری ہے، لاہور میں دودھ سپلائی کرنے والی 30گاڑیوں میں موجود 70ہزار لیٹر دودھ چیک کیا گیا۔

(جاری ہے)

ڈی جی فوڈ اتھارٹی عاصم جاوید نے بتایا کہ تلف کردہ دودھ میں پانی کی ملاوٹ سے قدرتی فیٹ کی کمی پائی گئی، دودھ کو جدید ترین لیکٹو سکین اور لیبارٹری میں ٹیسٹ کیا گیا،ملاوٹی دودھ نواحی علاقوں سے لاہور کی مختلف دکانوں پر سپلائی کیا جانا تھا۔

انہوںنے کہا کہ دودھ ہماری بنیادی غذا ہے، ملاوٹ کرنے والوں کے خلاف سخت کارروائی عمل میں لائی جائے گی ،معیاری اشیا کی فراہمی یقینی بنانے میں کسی قسم کی کوتاہی برداشت نہیں کی جائے گی، ملاوٹی و ناقص دودھ کا استعمال متعدد بیماریوں کا باعث بن سکتا ہے، پنجاب کے باسیوں تک معیاری خوراک کی یقینی فراہمی کے لیے مسلسل کارروائیاں جاری ہیں۔