وزیرتعلیم نے ایجوکیشن ڈیپارٹمنٹ کو سکولوں میں سہولیات کا فقدان دور کرنے کیلئے 4 ماہ کی ڈیڈ لائن دیدی

سر وس ڈیلیوری پر کوئی سمجھوتہ نہیں، جہاں ضرورت ہو فنڈز خرچ کرنے سے اجتناب نہ کیا جائے‘ رانا سکندر حیات

پیر 5 مئی 2025 18:53

وزیرتعلیم نے ایجوکیشن ڈیپارٹمنٹ کو سکولوں میں سہولیات کا فقدان دور ..

لاہور (اُردو پوائنٹ اخبارتازہ ترین - این این آئی۔ 05 مئی2025ء) وزیر تعلیم پنجاب رانا سکندر حیات نے محکمہ تعلیم کو سکولوں میں سہولیات کا فقدان دور کرنے کے لئے 4ماہ کی ڈیڈ لائن دیتے ہوئے تمام سی ای اوز کو صاف پانی سمیت دیگر مسنگ فیسیلیٹیز 120دن میں دور کرنے کی ہدایت کر دی۔ وزیر تعلیم نے سی ای اوز، ڈی ای اوز کانفرنس سے خطاب کرتے ہوئے تعلیمی افسران پر واضح کیا کہ سروس ڈیلیوری پر کوئی سمجھوتہ نہیں ہوگا سہولیات کا فقدان دور کرنے کیلئے وافر فنڈز دیں گے۔

جہاں ریسورسز کی فراہمی درکار ہے اور جہاں ضرورت ہو، وہاں فنڈز خرچ کرنے سے اجتناب نہ کیا جائے۔ وزیر تعلیم نے کہا کہ آئندہ مالی سال میں تعلیمی بجٹ پر خصوصی توجہ دی جا رہی ہے۔ ہم گلوبل سٹینڈرڈ کے مطابق ایجوکیشن سسٹم بنا رہے ہیں۔

(جاری ہے)

انہوں نے مزید کہا کہ محکمہ تعلیم میں اگر پیچھے مڑ کر دیکھیں تو آج تعلیمی حالات پہلے سے بہت بہتر دکھائی دیتے ہیں۔

وزیر تعلیم نے کہا کہ سسٹم سے طاقتور کوئی نہیں ہے، ہمیں مل کر تعلیمی نظام کی اصلاح کرنی ہے۔ اس حوالے سے تمام ضلعی تعلیمی افسران کی کارکردگی کو خود جانچ رہا ہوں۔ کارکردگی کی بنیاد پر سزا اور جزا کا نظام بھی متعین کیا گیا ہے۔ رانا سکندر حیات نے تعلیمی افسران کو سکول لائبریریز اپ گریڈ کرنے، شام کے اوقات میں لائبریریز کو بچوں کے استفادہ کیلئے کھلی رکھنے اور سکولوں میں کمپیوٹر و سائنس لیبز کی اپ گریڈیشن پر خصوصی توجہ دینے کی ہدایات بھی دیں۔