Live Updates

نوازالدین نے بالی ووڈ کو چورقرار دیدیا

بالی ووڈ عدم تحفظ کا شکار ہے،ہم نے گانے چوری ،فلموں کی کہانیاں چوری کیں، اب چورتخلیقی کیسے ہوسکتے ہیں ، بالی ووڈ اداکار

پیر 5 مئی 2025 22:38

ممبئی (اُردو پوائنٹ اخبارتازہ ترین - این این آئی۔ 05 مئی2025ء)بالی ووڈ اداکار نواز الدین صدیقی نے بھارت کی سب سے بڑی فلمی صنعت بالی ووڈ کو چور قرار دے دیا۔بھارتی میڈیا رپورٹس کے مطابق نوازالدین ان دنوں اپنی آنے والی فلم کوسٹا کی تشہیری مہم میں مصروف ہیں۔اس دوران انہوں نے ایک تقریب میں بالی ووڈ پر تنقید کرتے ہوئے کہا کہ بالی ووڈ میں اصل کہانیوں کا فقدان ہے، ماضی کے فارمولوں کو دہرانے کے ساتھ ساتھ جنوبی فلموں اور گانوں کی نقل کی جاتی ہے۔

انہوں نے بالی ووڈ میں جاری سیکوئلز اور ری میک کے رجحان کو تخلیقی صلاحیتوں کا دیوالیہ قرار دیا۔اداکار کے مطابق بالی ووڈ عدم تحفظ کا شکار ہے، انہیں لگتا ہے جو فارمولا چل رہا ہے اسے ہی چلا لو، اس سے بھی زیادہ افسوسناک تو یہ ہے کہ ہم شروع سے چور ہیں۔

(جاری ہے)

نوازالدین کا کہنا ہے کہ ہماری انڈسٹری شروع سے چور ہے، ہم نے گانے چوری کیے، فلموں کی کہانیاں چوری کیں اب جو چور ہوتے ہیں وہ پھر تخلیقی کیسے ہوسکتے ہیں ہم نے کبھی ساتھ سے چوری کی ہے، کبھی یہاں سے، کبھی وہاں سے چوری کی، یہاں تک کہ کچھ کلٹ فلمیں جو ہٹ ہوئیں ان کے سین بھی کاپی کیے گئے ہیں۔

انہوں نے کہا کہ اسے اتنا عام کر دیا گیا ہے کہ چوری ہی تو کیا ہے، تو کیا ہو جائے گا اب آپ اس طرح کی صنعت سے کیا امید کر سکتے ہیں انہوں نے کہا کہ جب ایسا ہوگا تو اداکار اور ہدایت کار انوراگ کشیپ کی طرح چھوڑنا شروع کر دیتے ہیں، جو اچھا کام لا رہے تھے۔