سندھ اسمبلی کی پبلک اکائونٹس کمیٹی کاآبادی پرکنٹرول کے لئے سندھ بھر کی تمام یوسیز میں پاپولیشن سینٹرز قائم کرنے کا حکم

کراچی(اُردو پوائنٹ اخبارتازہ ترین - این این آئی۔ 06 مئی2025ء)سندھ اسمبلی کی پبلک اکائونٹس کمیٹی نے سندھ میں آبادی پر کنٹرول کے لئے سندھ بھر کی تمام 1600 یوسیز میں یوسی سطح پر پاپولیشن سینٹرز قائم کرنے کا محکمہ پاپولیشن ویلفیئر کو حکم جاری کرتے ہوئے نکاح نامے میں شادی والے جوڑے کی ایچ آئی ای وی ایڈز اور تھیلیسمیا کی ٹیسٹ لازمی قرار دینے کا خانہ شامل کرنے کی سندھ حکومت کو سفارش کردی ہے جبکہ پی اے سی نے سندھ میں رجسٹرڈ نکاح خوانوں کو نکاح سے قبل جوڑے کی ایچ آئی وی ایڈز اور تھیلیسمیا ٹیسٹ رپورٹ لازمی جانچنے کے لئے پابند بنانے کی متعلقہ محکموں کو ہدایت کردی ہے۔

منگل کو پی اے سی کا اجلاس چیئرمین نثار کھوڑو کی صدارت میں کمیٹی روم میں ہوا اجلاس میں کمیٹی کے رکن طاحہ احمد اور محکمہ پاپولیشن ویلفیئر کے سیکریٹری حفیظ اللہ عباسی سمیت سندھ بھر کے ڈسٹرکٹ پاپولیشن ویلفیئر آفسران نے شرکت کی۔

(جاری ہے)

اجلاس میں محکمہ پاپولیشن ویلفیئر کی سال 2018ع سے 2020ع تک آڈٹ پیراز کا جائزہ لیا گیا۔اجلاس میں چیئرمین پی اے سی نثار کھوڑو نے محکمے سے استفسار کیا کے سندھ میں فیملی پلاننگ کے کئے محکمہ کے پاس کیا مکینزم ہی جس پر سیکریٹری پاپولیشن ویلفیئر حفیظ اللہ عباسی نے پی اے سی کو بتایا کے فیملی پلاننگ کے لئے سندھ میں محکمے کے 900 پاپولیشن سینٹرز کام کر رہے ہیں تاہم سندھ میں روزانہ 11 ہزار بچے پیدا ہو رہے ہیں تاہم سندھ میں فیملی پلاننگ کے لئے 18 ہزار لیڈی ہیلتھ ورکرز کام کر رہی ہیں تاہم سندھ کے 40 فیصد علاقوں میں لیڈی ہیلتھ ورکرز کی کمی ہے۔

سیکریٹری پاپولیشن نے مزید بتایا کے لیڈی ہیلتھ ورکرز کی بھرتیوں کے لئے کرائیٹیریا میٹرک پاس ہے تاہم میٹرک پاس لڑکیوں کی کمی کی وجہ سے لیڈی ہیلتھ ورکرز کی مستقل بھرتیاں نہیں ہوسکی ہیں اس لئیسندھ کے 40 فیصد علاقوِں میں لیڈی ہیلتھ ورکرز کی کمی کو پورا کرنے کے لئے پی پی ایچ آئی تھرڈ پارٹی کمپنی کے ذریعے کانٹریکٹ پر لیڈی ہیلتھ ورکرز کی بھرتیاں کرنے کی حکمت عملی بنا چکی ہے۔

چیئرمین پی اے سی نثار کھوڑو نے کہا کے فیملی پلاننگ پر عمل کرنے کے لئے سندھ بھر میں یوسی سطح تک پاپولیشن سینٹرز قائم کئے جائیں۔ پی اے سی نے سندھ میں آبادی پر کنٹرول کے لئے سندھ بھر کی تمام 1600 یوسیز میں یوسی سطح پر پاپولیشن سینٹرز قائم کرنے کا محکمہ پاپولیشن ویلفیئر کو حکم جاری کردیا۔چیئرمین پی اے سی نثار کھوڑو نے محکمہ کو ہدایت کی کے یوسیز چیئرمینز کے دفاترز کے احاطے میں پاپولیشن سینٹرز قائم کئے جائیں۔

چیئرمین پی اے سی نثار کھوڑو نے استفسار کیا کے شادی والے جوڑوں کی نکاح سے قبل ایچ آئی وی ایڈز اور تھیلیسیمیا ٹیسٹ لازمی ہونے پر سندھ میں عمل کتنا عمل ہو رہا ہی جس پر سیکریٹری پاپولیشن نے بتایا کے شادی والے جوڑوں کی میڈیکل ٹیسٹس رپورٹس لازمی چیک کرنے کے کئے نکاح خوانوں کو پابند کرنا چاہئے۔جس پر پی اے سی نے نکاح نامے میں شادی والے جوڑے کی ایچ آئی ای وی ایڈز اور تھیلیسمیا کی ٹیسٹ لازمی قرار دینے کا خانہ شامل کرنے کی سندھ حکومت کو سفارش کرتے ہوئے سندھ میں رجسٹرڈ نکاح خوانوں کو نکاح سے قبل جوڑے کی ایچ آئی وی ایڈز اور تھیلیسمیا ٹیسٹ رپورٹ لازمی جانچ کرنے کے لئے پابند بنانے کی متعلقہ محکموں کو ہدایت کردی۔

اس موقعے پر پی اے سی نے اس متعلق محکمہ ہیلتھ،محکمہ پاپولیشن اور محکمہ بلدیات کو مکینزم بنانے کی بھی ہدایت کردی۔