بھارت میں مسلمان فاسٹ بولر محمد شامی کو قتل کی دھمکی ،ایک کروڑ روپے تاوان بھی طلب

منگل 6 مئی 2025 20:20

نئی دہلی (اُردو پوائنٹ اخبارتازہ ترین - اے پی پی۔ 06 مئی2025ء) بھارتی کرکٹ ٹیم کے مسلمان فاسٹ بولر محمد شامی کو ای میل پر قتل کی دھمکی موصول ہوئی ہے ۔ایک کروڑ روپے تاوان بھی طلب کیا گیا ہے۔

(جاری ہے)

کشمیرمیڈیاسروس کے مطابق محمد شامی کے بھائی حسیب احمد نے ریاست اتر پردیش کے ضلع امروہہ میں سائبر کرائم پولیس اسٹیشن میں ایف آئی آر درج کرائی جس کے مطابق ای میل'' راجپوت سندر''نامی شخص کے ای میل ایڈریس سے موصول ہوئی جس میں شامی کو قتل کی دھمکی دی گئی اور ایک کروڑ روپے تاوان کا مطالبہ کیا گیا۔

ای میل میں ''پربھاکر''نامی شخص کا بھی ذکر ہے جس کی شناخت ابھی تک نہیں ہو سکی۔پولیس نے معاملے کی تحقیقات شروع کردی ہیں اور سائبر سیل اور کرائم برانچ کو شامل کر لیا گیا ہے۔ ای میل کا پرنٹ آئوٹ بطور ثبوت پولیس کو فراہم کیا گیا ہے۔ شامی کی حفاظت کے لیے اضافی اقدامات کیے جا رہے ہیں۔