لاہور میں یکے بعد دیگرے 3 دھماکوں کی اطلاعات، گجرات میں ڈرون آن گرا

دھماکے سن کر لوگ گھروں سے باہر نکل آئے، ریسکیو کی فائر فائٹنگ گاڑیاں جائے وقوعہ پر پہنچ گئیں

ساجد علی جمعرات 8 مئی 2025 08:21

لاہور میں یکے بعد دیگرے 3 دھماکوں کی اطلاعات، گجرات میں ڈرون آن گرا

لاہور ( اُردو پوائنٹ اخبارتازہ ترین۔ 08 مئی 2025ء ) صوبہ پنجاب کے دارالحکومت لاہور کے علاقہ والٹن روڈ میں یکے بعد دیگرے 3 دھماکوں کی اطلاعات موصول ہوئی ہیں، جس سے لوگوں میں خوف ہراس پھیل گیا۔ میڈیا رپورٹس کے مطابق لاہور پولیس کا کہنا ہے کہ لاہور کے علاقے والٹن اور اس کے نواحی علاقوں گوپال نگر اور نصیر آباد میں 3 زوردار دھماکے ہوئے ہیں، دھماکوں کی آواز کئی کلو میٹر دور تک سنی گئی، تاہم ابھی تک کسی سرکاری سطح پر دھماکوں کی نوعیت یا وجہ کی تصدیق نہیں کی گئی، سکیورٹی ادارے صورتِ حال کا جائزہ لے رہے ہیں۔

عینی شاہدین نے بتایا کہ تین زوردار دھماکوں کی آوازیں پرانے ایئرپورٹ کی سمت سے سنائی دیں، واقعے کے فوراً بعد ریسکیو ٹیمیں اور فائر فائٹنگ وہیکلز جائے وقوعہ پر پہنچ گئیں۔

(جاری ہے)

بتایا گیا ہے کہ دھماکے سن کر لوگ گھروں سے باہر نکل آئے اور ریسکیو کی فائر فائٹنگ گاڑیاں فوری جائے وقوعہ پر پہنچ گئیں، اس کے علاوہ پولیس کی بھاری نفری بھی جائے وقوعہ پر پہنچا دی گئی، پولیس نے علاقے کو گھیرے میں لے لیا اور غیر متعلقہ افراد کو روک دیا گیا جب کہ سکیورٹی فورسز نے دھماکوں کی نوعیت سے متعلق جاننے کیلئے تحقیقات کا آغاز کردیا۔

معلوم ہوا ہے کہ پنجاب کے شہر گجرات کے علاقے ڈنگہ کے قریب کھیتوں میں ڈرون گرا ہے، پولیس نے بتایا کہ ریسکیو اور پوکیس ٹیمیں جائے وقوعہ پر موجود ہیں جنہوں نے ڈرون کا ملبہ اکٹھا کرنے کا کام شروع کردیا، اس حوالے سے مزید تحقیقات بھی کی جارہی ہیں ابتدائی اطلاعات میں یہ تصدیق ہوئی ہے کہ کھیتوں میں ایک ڈرون کا ملبہ گرا جس میں کسی قسم کا کوئی جانی نقصان نہیں ہوا۔ اس کے بارے میں عینی شاہدین نے بتایا کہ وہ ہوٹل پر بیٹھے کھانا کھارہے تھے کہ اچانک ایک دھماکہ سنا جس کے بعد آسمان پر سرخ روشنی ہوگئی اور کوئی چیز نیچے گرتی دکھائی دی، تاہم جیسے ہی ریسکیو اور پولیس کی ٹیمیں وہاں پہنچیں تو کچھ ٹکڑے دکھائی دیئے جو بظاہر ایک ڈرون یا ڈیوائس پھٹنے کے ہیں۔