40 سے 50 بھارتی فوجی ہلاک کردیئے، جلد بھرپور جواب دیں گے کہ دنیا دیکھے گی، وزیراطلاعات

اسلام آباد ( اُردو پوائنٹ اخبارتازہ ترین۔ 08 مئی 2025ء ) وفاقی وزیر وزیراطلاعات عطاء اللہ تارڑ کا کہنا ہے کہ کائن آف کنٹرول پر 40 سے 50 بھارتی فوجی ہلاک کردیئے، جلد بھرپور جواب دیں گے کہ دنیا دیکھے گی۔ قومی اسمبلی اجلاس میں اظہار خیال کرتے ہوئے انہوں نے کہا کہ بزدل بھارت نے تاریکی میں پاکستان پر حملہ کیا، بھارت سویلین آبادی کو نشانہ بنا رہا ہے لیکن ہم سولینز کو نشانہ نہیں بنا رہے، ہم ٹھوس اور مؤثر جواب دے رہے ہیں، قومی سلامتی کمیٹی نے افواج کو مؤثر اور بھرپور جواب دینے کا مکمل اختیار دے دیا ہے، اب یہ معاملہ آگے کہاں جاتا ہے اس کا فیصلہ ہم کریں گے، بھارت کو پاکستان کا بھرپور جواب آئے گا، ضرور اور جلد آئے گا، ایسا جواب ہوگا کہ دنیا یاد رکھے گی۔

وفاقی وزیر کا کہنا ہے کہ بھارت نے دنیا کی جدید ترین ٹیکنالوجی رافیل کی شکل میں استعمال کی، جس پر بھارت کو بہت غرور و ناز تھا وہ خاک میں مل چکا ہے، یہ بھارتی جہاز نہیں گرے بلکہ بھارتی قوم کا غرور گرا ہے، اپنے شاہینوں کو سلام پیش کرتے ہیں جنہوں نے بھارت کا غرور خاک میں ملایا، ہم ان کو چائے پلانے کو تیار تھے لیکن اس بار دشمن بھاگ گیا، ہم نے اس بار چائے کی ہوم ڈیلیوری کی ہے۔

(جاری ہے)

ن لیگی رہنما نے کہا کہ پاکستانی ادارے اور افواج ہر سازش کا سینہ تان کر مقابلہ کر رہے ہیں، دشمن اپنے مقاصد کے لیے اعلیٰ سے اعلیٰ ٹیکنالوجی استعمال کر رہا ہے، بھارت نے اپنے عزائم کی تکمیل کے لیے حکمت عملی تبدیل کی ہے، اب اس نے ڈرون بھیجنے شروع کردیئے، ہم نے 50 ڈرونز مار گرائے، کچھ کو جیم کرکے اور کچھ کو ایئر ڈیفنس سسٹم سے گرایا گیا، گرائے گئے تباہ شدہ ڈرونز کا ملبہ ہم اپنے عجائب گھر میں رکھیں گے کیوں کہ ان ڈرونز کو گرا کر ہم نے ایک نئی مثال قائم کی ہے۔

عطاء اللہ تارڑ کہتے ہیں کہ بھارت کو شرم آنی چاہیئے کہ اب تو رافیل بنانے والے بھی سوال اٹھا رہے ہیں، رافیل کمپنی کے شیئرز 18 فیصد گرے ہیں، بھارت رافیل اور دیگر جہازوں کا ملبہ چھپانا چاہتا تھا، وہ جس طریقے سے پاکستان کا نقصان کرنا چاہتے تھے اس میں ناکام ہوئے، پاکستان نے سفارتی جنگ میں بھی بھارت کو شکست دی ہے، پاکستان قوم ہر موقع ہر اکھٹی ہو جاتی ہے، پاکستانی عوام ہمیشہ ایسی صورتحال میں اکھٹی ہوکر مقابلہ کرتی ہے۔