کاٹی اور بی بی شہید بورڈ کے درمیان باہمی تعاون پر اتفاق

کراچی (اُردو پوائنٹ اخبارتازہ ترین - این این آئی۔ 09 مئی2025ء) بینظیر بھٹو شہید ہیومن ریسورس ریسرچ اینڈ ڈویلپمنٹ بورڈ (BBSHRRDB) کے سیکریٹری منور علی مٹھانی نے کہا ہے کہ سندھ حکومت کے تحت زیادہ سے زیادہ ٹریننگ اداروں کو فعال کیا جا رہا ہے تاکہ نوجوانوں کو مقامی و بین الاقوامی مارکیٹ کی ضروریات کے مطابق جدید مہارتیں فراہم کی جا سکیں۔ ان خیالات کا اظہار انہوں نے کورنگی ایسوسی ایشن آف ٹریڈ اینڈ انڈسٹری (کاٹی) کے دورے پر کیا۔

تقریب میں کاٹی کے صدر جنید نقی، سینئر نائب صدر اعجاز شیخ، نائب صدر سید طارق حسین، ریجنل کنسلٹنٹ حیدرآباد ریجن انجینئر تیمور سیال، ریجنل کنسلٹنٹ سکھر ریجن سلیمان دستی، ڈپٹی ڈائریکٹر معصومہ رضوی سمیت کاٹی کے دیگر ممبران و اعلیٰ عہدیدار بھی موجود تھے۔

(جاری ہے)

سیکریٹری بورڈ منور علی مٹھانی نے مزید کہا کہ بی بی شہید بورڈ کا وژن ''ہنرمند اور مثبت نوجوان، پرامن، خوشحال اور مضبوط پاکستان'' کی عملی تعبیر ہے، نیم خواندہ اور تعلیم یافتہ نوجوانوں کو روزگار سے ہم آہنگ مہارتیں سکھا کر ان کی زندگی بدلنے کے مواقع فراہم کیے جا رہے ہیں۔

انہوں نے کہا کہ صنعتی شعبے کی ضروریات اور مستقبل کے منصوبوں کو مدنظر رکھتے ہوئے ہنر مند افرادی قوت تیار کی جا رہی ہے تاکہ نہ صرف مقامی مارکیٹ بلکہ عالمی سطح پر بھی پاکستانی نوجوانوں کی کھپت بڑھائی جا سکے۔ اس مقصد کے لیے پبلک اور پرائیویٹ سیکٹر کے درمیان مضبوط روابط قائم کیے جا رہے ہیں۔ بورڈ کی کوشش ہے کہ تکنیکی و پیشہ ورانہ تعلیم کی اہمیت کو نچلی سطح تک اجاگر کیا جائے تاکہ عوام میں شعور پیدا ہو۔

اس سے قبل کاٹی کے صدر جنید نقی نے بورڈ کی کاوشوں کو سراہتے ہوئے کہا کہ ملکی ترقی کے لیے صنعتوں کو ایسے ہنر مند نوجوانوں کی ضرورت ہے جو جدید تقاضوں پر پورا اترتے ہوں۔ انہوں نے کہا کہ بی بی شہید بورڈ اور کاٹی کے درمیان اس تعاون سے صنعتی شعبے کو بڑی تقویت ملے گی اور مقامی نوجوانوں کو باعزت روزگار کے مواقع حاصل ہوں گے۔صدر کاٹی نے کہا کہ اپرینٹس شپ آرڈیننس 1962 اور اس کے قواعد و ضوابط 1966 پر عمل درآمد کو یقینی بنایا جائے اور اسے موجودہ صنعتی ضروریات سے ہم آہنگ کیا جائے۔

سینئر نائب صدر اعجاز شیخ نے کہا کہ نیشنل انسٹیٹیوٹ اآف لیدر ڈویلپمنٹ موجود ہے جسے شہید بینظیر بورڈ کے تعاون کی ضرورت ہے جس میں لیدر کے شعبے سے وابستہ افراد کو پیشہ وارانہ تربیت فراہم کی جائے، کیونکہ لیدر انڈسٹری میں اس وقت کٹرز، اسٹچنگ اور پیٹرن تیار کرنے والے ہنر مند افراد کی قلت ہے۔ اس سلسلے میں ٹینرز ایسوسی ایشن اداروں سے مذکورہ شعبوں میں تربیت حاصل کرنے والے نوجوانوں کو روزگار کی یقین دہانی کراتی ہے۔ انہوں نے کہا کہ خواتین کو با اختیار بنانے کیلئے پر عزم ہیں۔