راولپنڈی چیمبر آف کامرس میں افواجِ پاکستان سے اظہارِ یکجہتی کے لیے خصوصی تقریب

جمعہ 9 مئی 2025 21:40

راولپنڈی (اُردو پوائنٹ اخبارتازہ ترین - اے پی پی۔ 09 مئی2025ء) راولپنڈی چیمبر آف کامرس میں افواجِ پاکستان سے اظہارِ یکجہتی کے لیے خصوصی تقریب کا انعقاد کیا گیا۔ اس موقع پر چیمبر عہدیداران، تاجر برادری، ممبران اور سول سوسائٹی کے نمائندوں کی بڑی تعداد نے بھرپور شرکت کی۔تاجر برادری نے یک زبان ہو کر یہ پیغام دیا کہ ’’ہم پاک افواج کے ساتھ کھڑے ہیں، کھڑے رہیں گے، اور ملکی دفاع کے لیے ہر ممکن تعاون فراہم کریں گے‘‘۔

تقریب میں اس بات کا پُرزور اعادہ کیا گیا کہ وطن عزیز کی سلامتی اور بقا کے لیے تاجر برادری کسی بھی قربانی سے دریغ نہیں کرے گی۔گروپ لیڈر سہیل الطاف نے اپنے خطاب میں کہا’’دنیا دیکھ رہی ہے کہ رافیل اور غرور و تکبر کو اللہ نے خاک میں ملا دیا ہے‘‘۔

(جاری ہے)

لیفٹیننٹ جنرل (ر) ناصر خان جنجوعہ (سابق مشیر قومی سلامتی) نے کہا:’’دشمن نے پہل کی، لیکن رب کریم نے ہمیں سبقت عطا فرمائی‘‘۔

ائر مارشل (ر) عامر مسعود نے انکشاف کیا’’انہوں نے 75 جنگی طیاروں کے ذریعے فضائی برتری حاصل کرنے کی کوشش کی، لیکن پاک فضائیہ نے ان کا منصوبہ ناکام بنا دیا‘‘۔وائس ایڈمرل (ر) خان ہاشم بن صدیقی نے کہا’’پاکستان نیوی ہر طرح کی ممکنہ صورتِ حال سے نمٹنے کے لیے مکمل تیار ہے‘‘۔تقریب میں بریگیڈیئر کامران احمد (این ڈی ایم اے) بھی موجود تھے، جنہوں نے موجودہ بھارتی جارحیت کے تناظر میں کاروباری برادری کو تازہ ترین صورتحال سے آگاہ کیا۔

تقریب کی صدارت صدر عثمان شوکت نے گروپ لیڈر سہیل الطاف کے ہمراہ کی۔ اس موقع پر سینئر نائب صدر خالد فاروق قاضی، نائب صدر فہد برلاس، سی ای او سینٹورس گروپ سردار یاسر، چیئرمین امور نوجوانان عبداللہ حمید گل، ایگزیکٹو کمیٹی ممبران، سابق صدور، اور تاجر تنظیموں کے رہنما اجمل بلوچ ، شاہد غفور پراچہ، شرجیل میر، چوہدری ممتاز، چوہدری فاروق بھی موجود تھے۔اس کے علاوہ خواتین ممبران، ویمن چیمبر کی صدر قراۃ العین اور سول سوسائٹی کے افراد کی بڑی تعداد نے بھی تقریب میں شرکت کی۔