Live Updates

پاک بحریہ کا مسلح افواج کے مشترکہ جذبے کو خراجِ تحسین، نیا ترانہ ’اے وطن‘ جاری

ترانے میں پاکستان کی دفاعی صلاحیت، قومی یکجہتی اور مسلح افواج کے عزم و ہمت کو اجاگر کیا گیا

ساجد علی منگل 13 مئی 2025 11:36

پاک بحریہ کا مسلح افواج کے مشترکہ جذبے کو خراجِ تحسین، نیا ترانہ ’اے ..

کراچی ( اُردو پوائنٹ اخبارتازہ ترین۔ 13 مئی 2025ء ) آپریشن بنیان مرصوص کی کامیابی کے بعد پاک بحریہ نے مسلح افواج کے لیے نیا ترانہ جاری کردیا۔ تفصیلات کے مطابق پاکستان نیوی نے مسلح افواج کے مشترکہ جذبے کو خراجِ تحسین پیش کرتے ہوئے نیا ترانہ ’اے وطن‘ جاری کیا ہے، یہ ترانہ آپریشن بنیان مرصوص میں تینوں مسلح افواج کی شاندار کامیابی کے موقع پر جاری کیا گیا۔

پاک بحریہ کی جانب سے اپنے ترانے ’اے وطن‘ میں ناصرف قوم کے دفاعی عزم کی ترجمانی کی گئی ہے بلکہ اس میں وطن کی خاطر جان قربان کرنے والے سپاہیوں کی بہادری اور قربانیوں کو بھی خراجِ عقیدت پیش کیا گیا، ترانے میں پاکستان کی دفاعی صلاحیت، قومی یکجہتی اور مسلح افواج کے عزم و ہمت کو اجاگر کیا گیا ہے جس نے ہر پاکستانی کے دل میں ایک نیا جوش اور ولولہ پیدا کردیا۔

(جاری ہے)

قبل ازیں پاکستان اور بھارت کے درمیان جاری کشیدہ علاقائی صورتحال کے پیشِ نظر پاکستانی قوم کے جذبات کی عکاسی کرتا ایک نیا ملی نغمہ ” لڑنے کیلئے تیار ہیں ہم“ بھی ریلیز کیا گیا، جس نے سننے والوں کے دلوں میں جوش و ولولہ بھردیا تھا، نغمہ میں شامل شاعری دل کو گرما دینے والی تھی، جس کی سحر انگیز آواز نے سننے والوں کو جذبے، عزم اور فخر کے ایک نئے احساس سے روشناس کرایا، اس ملی ترانے کے بول ’غالب ہیں خدا کا وار ہیں ہم ، لڑنے کے لیے تیار ہیں ہم‘، ہر پاکستانی کی زبان پر آ گئے، یہ نغمہ ناصرف ایک فنی شاہکار ثابت ہوا بلکہ دشمن کو بھی یہ واضح پیغام دیا کہ پاکستان ایک ایسی قوم ہے جو دینِ اسلام کے نام پر بنی اور اس کی فوج ایمان، تقویٰ اور جہاد فی سبیل اللہ کو اپنا موٹو سمجھتی ہے۔

ترانے میں بھارت کے جنگی جنون کو للکارتے ہوئے بتایا گیا کہ دشمن شاید بھول چکا ہے کہ وہ کس قوم سے ٹکرا رہا ہے، پاکستان کی مسلح افواج ہر محاذ پر برق رفتاری، جدید اسلحے اور سخت ترین تربیت کے ساتھ ہمہ وقت تیار ہیں، اس ملی نغمہ نے پاک فوج کی بہادری، قربانی اور قومی اتحاد کی ترجمانی کی، نغمہ ریلیز ہوتے ہی قوم کے ہر فرد کے دل کی آواز بن گیا، اس میں بار بار گونجنے والا ”اللہ اکبر“ کا نعرہ سننے والوں کے دلوں میں ایک نئی جرات، حوصلہ اور بھرپور ہمت پیدا کردیتا ہے۔