محکمہ داخلہ پنجاب کے سول ڈیفنس کو جدید خطوط پر استوار کرنے کےلئے 500 ملین روپے کے فنڈز جاری

منگل 13 مئی 2025 14:44

لاہور (اُردو پوائنٹ اخبارتازہ ترین - اے پی پی۔ 13 مئی2025ء) محکمہ داخلہ پنجاب نے وزیراعلی پنجاب کی ہدایت پر دفاع وطن کےلئےسول ڈیفنس کو جدید خطوط پر استوار کرنے کیلئے 500 ملین روپے کے فنڈز جاری کرنے کے ساتھ سیکرٹری داخلہ پنجاب نور الامین مینگل نے سول ڈیفنس کو صوبہ بھر سے 10 لاکھ رضاکاران کی رجسٹریشن کا ٹارگٹ بھی دے دیا ہے۔ ترجمان محکمہ داخلہ پنجاب کے مطابق سول ڈیفنس کےلئے گرانٹ محکمہ داخلہ کے انٹرنل سکیورٹی فنڈ سے دی گئی ہے۔

ترجمان نے بتایا کہ 50 کروڑ کی گرانٹ سے سول ڈیفنس کےلئے جدید آلات خریدے جائیں گے۔ ان آلات میں مائن ڈٹیکٹر، سنیک کیمرے، الیکٹرک سائرن، آگ بجھانے کے آلات، بم دھماکے سے بچاو کے بلینکٹ اور آئی ٹی کا سامان شامل ہے۔ ماڈرن آلات کی بدولت ہنگامی حالات سے نمٹنے کےلئے سول ڈیفنس کی استعداد کار میں اضافہ ہوگا۔

(جاری ہے)

سول ڈیفنس کے جدید آلات کی خریداری کےلئےفنڈز کی منظوری کابینہ کمیٹی برائے امن و امان نے دی۔

سول ڈیفنس قانونی تقاضوں پر عمل کرتے ہوئے رواں مالی سال کے دوران گرانٹ کو استعمال کرے گا۔ ترجمان نے بتایا کہ سول ڈیفنس صوبہ بھر میں نوجوانوں کو رجسٹریشن کے بعد رضاکار کی تربیت فراہم کرے گا۔ سیکرٹری داخلہ پنجاب کی ہدایت پر گزشتہ 5 دن میں سول ڈیفنس اور ریسکیو 1122 نے صوبہ بھر میں 118,289 افراد کو تربیتی مشقیں کروائی ہیں۔ ان تربیتی مشقوں میں دشمن کے حملے یا حادثے کی صورت میں ہنگامی انخلا، آگ بجھانے اور فرسٹ ایڈ بارے سکھایا گیا۔ ترجمان محکمہ داخلہ پنجاب نے بتایا کہ صوبہ بھر میں جاری تربیتی مشقوں کے دوران طلبا اور دیگر شہریوں کو ہنگامی حالات سے نمٹنے بارے راہنمائی فراہم کی جا رہی ہے۔ سول ڈیفنس اور ریسکیو 1122 صوبہ بھر میں مشترکہ تربیتی مشقیں کروا رہے ہیں۔