سینیٹر روبینہ خالد سے ورلڈ فوڈ پروگرام کے کنٹری ڈائریکٹر کوکو اوشیاما کی ملاقات

ڈبلیو ایف پی ،بی آئی ایس پی کا مستقبل کی حکمت عملیوں ،شراکت داری کو مزید موثر بنانے کیلئے متعلقہ سٹیک ہولڈرز کو شامل کرنے پر اتفاق

منگل 13 مئی 2025 20:45

اسلام آباد (اُردو پوائنٹ اخبارتازہ ترین - این این آئی۔ 13 مئی2025ء)ڈبلیو ایف پی اوربی آئی ایس پی نے مستقبل کی حکمت عملیوں ،شراکت داری کو مزید موثر بنانے کیلئے متعلقہ سٹیک ہولڈرز کو شامل کرنے پر اتفاق کرلیا۔منگل کو چیئرپرسن بے نظیر انکم سپورٹ پروگرام سینیٹر روبینہ خالد نے ورلڈ فوڈ پروگرام کی کنٹری ڈائریکٹر کوکو اوشیاما سے ایک ملاقات کی جس میں بی آئی ایس پی اور ڈبلیو ایف پی کے مابین مستحقین کیلئے غذائیت اور تعلیم سے متعلق اقدامات کو موثر بنانے کیلئے باہمی تعاون پر تفصیلی تبادلہ خیال کیا گیا۔

اس موقع پر ڈبلیو ایف پی کے ڈپٹی کنٹری ڈائریکٹر، راتھی پالا کرشنن، اور بی آئی ایس پی کے ڈائریکٹر جنرل، ڈاکٹر عاصم اعجاز بھی موجود تھے۔ملاقات کے دوران سکول میل پروگرام، نشوونما ڈیش بورڈ کی تیاری، ڈیٹا کا اشتراک، اور نشوونما مراکز کو زچہ و بچہ کی صحت سے متعلق مشاورتی مراکز میں تبدیل کرنے جیسے اہم نکات زیر بحث آئے۔

(جاری ہے)

چیئرپرسن بی آئی ایس پی نے نشوونما پروگرام کے تحت فراہم کی جانے والی معیاری غذائیت سے بھرپور خوراک کی اہمیت پر زور دیتے ہوئے کہا کہ یہ خوراک بچوں میں اسٹنٹنگ پر قابو پانے اور حاملہ و دودھ پلانے والی ماں کی صحت کو بہتر بنانے میں کلیدی کردار ادا کرتی ہے۔

انہوں نے خیبرپختونخوا کے نئے ضم شدہ اضلاع میں بھی نشوونما پروگرام کے تحت صحت کے اقدامات کے آغاز کی تجویز پیش کی۔ڈبلیو ایف پی کی کنٹری ڈائریکٹر نے مکمل تعاون کی یقین دہانی کراتے ہوئے اس بات پر اتفاق کیا کہ مستقبل کی حکمت عملیوں اور شراکت داری کو مزید موثر بنانے کیلئے دیگر متعلقہ اسٹیک ہولڈرز کو بھی شامل کیا جائے گا۔