Live Updates

وزیرِ داخلہ محسن نقوی کا یوم تشکر پر پاکستان رینجرز (پنجاب) ہیڈ کوارٹرز کا دورہ، یادگار شہداء پر حاضری، پھول رکھے

شہداء کی عظیم قربانیوں کو شاندار الفاظ میں خراج عقیدت،شہداء کے خاندانوں سے ملاقات اور ان کے بلند حوصلے کو سراہا

جمعہ 16 مئی 2025 20:23

وزیرِ داخلہ محسن نقوی کا یوم تشکر پر پاکستان رینجرز (پنجاب) ہیڈ کوارٹرز ..

لاہور(اُردو پوائنٹ اخبارتازہ ترین - این این آئی۔ 16 مئی2025ء)وفاقی وزیرِ داخلہ محسن نقوی نے یوم تشکر پر آج پاکستان رینجرز (پنجاب) ہیڈ کوارٹرز کا دورہ کیا۔ ڈائریکٹر جنرل پاکستان رینجرز (پنجاب) میجر جنرل محمد عاطف بن اکرم نے وزیرِ داخلہ محسن نقوی کا استقبال کیا۔وزیرداخلہ نے یادگار شہداء پر حاضری دی، یادگار شہداء پر پھول رکھے اور فاتحہ خوانی کی۔

وزیر داخلہ محسن نقوی نے شہداء کی درجات کی بلندی کے لیے دعا کی اور شہداء کی عظیم قربانیوں کو شاندار الفاظ میں خراج عقیدت پیش کیا۔ وفاقی وزیرداخلہ محسن نقوی نے شہداء کے خاندانوں سے ملاقات کی اور ان کے بلند حوصلے کو سراہا۔ وزیرداخلہ نے شہداء کے خاندانوں کے مسائل سنے اور ان کے حل کیلئے موقع پر ہی ہدایات دیتے ہوئے کہا کہ شہداء کے خاندانوں کے مسائل حل کرنا ہماری ذمہ داری ہے، شہداء ہمارے ماتھے کا جھومر ہیں۔

(جاری ہے)

انہوں نے کہا کہ پوری قوم شہداء کے خاندانوں کو سلیوٹ کرتی ہے۔ انہوں نے اس بات پر زور دیا کہ شہدائ کی قربانیوں کی کوئی نظیر نہیں ملتی، پوری قوم شہداء کے خاندانوں کے ساتھ کھڑی ہے۔ انہوں نے مزید کہا کہ پاکستان رینجرز پنجاب کے افسران اور جوانوں نے جرات اور دلیری کی تاریخ لکھی ہے، قوم کو اپنے بہادر سپوتوں پر ناز ہے۔ وزیرِ داخلہ محسن نقوی نے پاکستان رینجرز (پنجاب) کی پیشہ وارانہ کارکردگی اور عزم و حوصلہ کو سراہا۔ بعد ازاں انہوں نے مہمانوں کی کتاب میں اپنے تاثرات قلمبند کیے۔