مغربی کنارہ: اسرائیل سے ماورائے عدالت ہلاکتیں بند کرنے کا مطالبہ

اسلام آباد (اُردو پوائنٹ ۔ UN اردو۔ 16 مئی 2025ء) اقوام متحدہ کے دفتر برائے انسانی حقوق (او ایچ سی ایچ آر) نے اسرائیل پر زور دیا ہے کہ وہ مقبوضہ مغربی کنارے میں ماورائے عدالت ہلاکتوں اور شہریوں کے خلاف طاقت کے ناجائز استعمال کا سلسلہ بند کرے اور ایسے واقعات کے ذمہ داروں کو انصاف کے کٹہرے میں لایا جائے۔

ادارے کا کہنا ہے کہ علاقے میں اسرائیل کی سکیورٹی فورسز بے حسی پر مبنی طرزعمل کا مظاہرہ کرتے ہوئے شہریوں پر حملے کر رہی ہیں۔

8 مئی کو اسرائیل کی خفیہ سکیورٹی فورسز نے نابلوس میں 30 سالہ فلسطینی شخص کو ہلاک کیا۔

(جاری ہے)

اس واقعے کی سی سی ٹی وی فوٹیج میں دیکھا جا سکتا ہے کہ مقتول نے سکیورٹی فورس کے اہلکار کے سامنے ہتھیار ڈالنے کی کوشش کی تاہم اسے گولی مار کر ہلاک کر دیا گیا۔

مہلک طاقت کا غیرضروری استعمال

'او ایچ سی ایچ آر' نے کہا ہے کہ اس ویڈیو سے اسرائیلی حکام کے ان دعووں کی نفی ہوتی ہے کہ ہلاک ہونے والا شخص مسلح تھا اور اس سے سکیورٹی اہلکاروں کو خطرات لاحق تھے۔

نابلوس میں پیش آںے والے ایک اور واقعے میں اسرائیلی سکیورٹی فورسز کے خفیہ اہلکاروں نے 39 سالہ فلسطینی شخص کو ہلاک کر دیا۔

اطلاعات کے مطابق، گزشتہ بدھ کو اسرائیلی فورسز نے یروشلم کے قلندیہ پناہ گزین کیمپ کے قریب ایک فلسطینی نوجوان کو فائرنگ کر کے زخمی کر دیا۔ اس واقعے کی ویڈیو میں دو اسرائیلی اہلکاروں کو اس نوجوان کے سر پر ٹھوکریں مارتے دیکھا جا سکتا ہے جبکہ وہ ران پر آنے والے زخم کے باعث زمین پر گرا ہوا تھا۔

اجتماعی سزا سے گریز کا مطالبہ

'او ایچ سی ایچ آر' کے مطابق، مغربی کنارے کے علاقے بروخین میں 30 سالہ حاملہ فلسطینی خاتون کو مسلح فلسطینیوں نے گولی مار کر ہلاک کر دیا۔ یہ خاتون بچے کو جنم دینے کے لیے اپنے شوہر کے ساتھ کار میں ہسپتال جا رہی تھی جو اس واقعے میں بری طرح زخمی ہو گیا۔

اس دوران برخین اور سالفیت میں لوگوں کی نقل و حرکت پر بھی کڑی پابندیاں عائد کی گئیں جبکہ ایک اسرائیلی وزیر نے اس واقعے کے جواب میں فلسطینی دیہات کو مسمار کرنے کا مطالبہ کیا۔

'او ایچ سی ایچ آر' نے کہا ہے کہ اسرائیلی سکیورٹی فورسز کو یقینی بنانا ہو گا کہ اس حملے کے بعد اٹھائے جانے والے اقدامات بین الاقوامی قانون کے مطابق ہوں جن میں لوگوں کو اجتماعی سزا دینے کی ممانعت بھی شامل ہے۔

حصول تعلیم کا 'جرم'

فلسطینی پناہ گزینوں کے لیے اقوام متحدہ کے امدادی ادارے (انروا) نے بتایا ہے کہ گزشتہ ہفتے اسرائیلی فوج کی کارروائی کے بعد مشرقی یروشلم میں اس کے سکول تاحال بند ہیں جس سے تقریباً 800 طلبہ کی تعلیم متاثر ہو رہی ہے۔

مغربی کنارے میں 'انروا' کے امور کے ڈائریکٹر رولینڈ فریڈرک نے بتایا ہے کہ گزشتہ دنوں اسرائیل کی سکیورٹی فورسز کے اہلکار شفات کیمپ میں واقع ان سکولوں میں واپس آئے اور تصدیق کی کہ وہاں کوئی تعلیمی سرگرمیاں نہ ہوں۔

رولینڈ فریڈرک نے کہا ہے کہ مشرقی یروشلم میں اسرائیلی حکام کی جانب سے تعلیمی سرگرمیوں کو جرم بنانا ہر سطح پر قابل مذمت ہے اور یہ سکول بلاتاخیر کھولے جانے چاہئیں۔