علی امین گنڈاپور کی کوششوں سے ضلع کرم میں امن قائم ہو چکا ہے‘ بیرسٹر سیف

پیر 19 مئی 2025 22:08

پشاور(اُردو پوائنٹ اخبارتازہ ترین - آن لائن۔ 19 مئی2025ء) مشیر اطلاعات خیبرپختونخوا بیرسٹر ڈاکٹر سیف نے کہا ہے کہ علی امین گنڈاپور کی کوششوں سے ضلع کرم میں امن قائم ہو چکا ہے۔اپنے بیان میں بیرسٹر سیف کا کہنا تھا کہ علاقے کو بنکروں اور اسلحے سے پاک کر دیا گیا ہے، مجموعی طور پر دونوں فریقین کے تقریباً 979 بنکرتباہ کئے گئے ہیں، 86 دیہات کو غیر مسلح کر کے اسلحہ اور گولہ بارود سرکاری تحویل میں لے لیا گیا ہے، فریقین کے درمیان کشیدگی کی بڑی وجہ بنکرز اور اسلحہ تھا۔

(جاری ہے)

انہوں نے کہا کہ وزیراعلیٰ نے دورانِ کشیدگی اپنا ہیلی کاپٹرامدادی سرگرمیوں کیلئے مختص کر دیا تھا، ہیلی کاپٹر کی 338 پروازوں کے ذریعے 29,140 کلوگرام ادویات متاثرہ علاقے تک پہنچائی گئیں، مریضوں سمیت 9,290 افراد کو محفوظ طریقے سے پشاور اور دیگر علاقوں میں منتقل کیا گیا، علاقے میں اب ترقیاتی عمل تیزی سے جاری ہے۔رہنما پی ٹی آئی کا کہنا تھا کہ ٹل پاراچنار روڈ کی مرمت کیلئے 10 کروڑ روپے کی منظوری دی جا چکی ہے، 9.6 ارب روپے کی لاگت سے سڑک کی توسیع کا منصوبہ جاری ہے، بازاروں کی تزئین وآرائش کے 728 ملین روپے کے منصوبے میں سے 300 ملین سے زائد خرچ کئے جا چکے ہیں۔