سردار اویس احمد خان لغاری کا نیٹ میٹرنگ کیلئے نئی درخواستوں کے طریقہ کار کو آسان اور صارف دوست بنانے پر زور

منگل 20 مئی 2025 23:17

اسلام آباد (اُردو پوائنٹ اخبارتازہ ترین - این این آئی۔ 20 مئی2025ء)وفاقی وزیر توانائی سردار اویس احمد خان لغاری نے نیٹ میٹرنگ کے لئے نئی درخواستوں کے طریقہ کار کو آسان، شفاف اور صارف دوست بنانے پر زور دیتے ہوئے کہا ہے کہ اس عمل میں درپیش مسائل کا فوری اور مؤثر حل تلاش کیا جائے۔

(جاری ہے)

ترجمان وزارت توانائی کی جانب سے جاری اعلامیہ کے مطابق ان خیالات کا اظہار انہوں نے نیٹ میٹرنگ کے نئے کنکشنز کی آن لائن پورٹل کے ذریعے فراہمی کے حوالے سے جائزہ اجلاس کی صدارت کرتے ہوئے کیا۔

وفاقی وزیر نے کہا کہ بجلی کی تقسیم کار کمپنیوں کے اہلکاروں کو نئے پورٹل سے متعلق ضروری ٹریننگ دی جائے اور اس کا عملی مظاہرہ بھی کیا جائے۔ انہوں نے ہدایت کہ بجلی صارفین کو پورٹل کے استعمال اور شفافیت سے متعلق آگاہی پروگرام تشکیل دیا جائے۔