ڈپٹی کمشنر ایبٹ آباد کی زیر صدارت نالوں کے اطراف تجاوزات کے خاتمہ کےلئے اجلاس، فول پروف حکمت عملی پر غور کیا

بدھ 21 مئی 2025 11:40

ایبٹ آباد (اُردو پوائنٹ اخبارتازہ ترین - اے پی پی۔ 21 مئی2025ء) ڈپٹی کمشنر ایبٹ آباد کیپٹن (ر) ثناءﷲ خان کی زیر صدارت دریائوں اور ندی نالوں کے اطراف تجاوزات کے خاتمہ سے بارے اجلاس منعقد ہوا جس میں ضلع بھر کے حساس اور متاثرہ علاقوں میں قائم تجاوزات کے خاتمہ کےلئے فول پروف حکمت عملی پر غور کیا گیا۔ اجلاس میں ایڈیشنل ڈپٹی کمشنر جنرل گوہرعلی، ڈی ایف او گلیات، اسسٹنٹ کمشنر ایبٹ آباد زرک یار خان تورو، انڈر ٹریننگ اسسٹنٹ کمشنر، ایریگیشن ڈیپارٹمنٹ، تمام ٹی ایم اوز اور متعلقہ اداروں کے افسران نے شرکت کی۔

ضلعی انتظامیہ کی جانب سے فراہم کردہ تفصیلات کے مطابق بلال ٹائون، حسن ٹائون، ہرنو، مین بازار، بس سٹینڈ، کنج، کیہال، مین شاہراہ ریشم، میرپور، کاکول، جھنگی اور دیگر ملحقہ علاقوں کے علاوہ کامسیٹس یونیورسٹی سے لیکر کمپلیکس تک کئی نالے مکمل طور پر غائب ہو چکے ہیں۔

(جاری ہے)

بعض مقامات پر نالے ریت، مٹی اور تعمیرات میں دب کر ختم ہو چکے ہیں جبکہ دیگر مقامات پر باقاعدہ تجاوزات کھڑی کر دی گئی ہیں جن پر دکانیں، پلازے اور مکانات تعمیر ہو چکے ہیں۔

ڈپٹی کمشنر ایبٹ آباد کیپٹن (ر) ثناءاﷲ خان نے اجلاس میں دو ٹوک موقف اختیار کرتے ہوئے واضح کیا کہ ندی نالوں اور قدرتی گزرگاہوں پر قابض عناصر کسی رعایت کے مستحق نہیں۔ انہوں نے کہا کہ تجاوزات کے خلاف بھرپور اور بلا امتیاز آپریشن کا آغاز کیا جائے گا اور یہ آپریشن اس وقت تک جاری رہے گا، جب تک ہر سرکاری نالہ دوبارہ بحال نہیں ہو جاتا۔ ضلعی انتظامیہ نے عوام سے اپیل کی ہے کہ وہ نالوں پر قبضہ کرنے والے عناصر کی نشاندہی کریں تاکہ ماحولیاتی اور شہری نظام کی بحالی کو ممکن بنایا جا سکے، ہر شہری کی نشاندہی کو خفیہ رکھا جائے گا اور اس پر فوری کارروائی کی جائے گی۔

Facebook Twitter Google + Share on Whatsapp

ڈپٹی کمشنر ایبٹ آباد کی زیر صدارت نالوں کے اطراف تجاوزات کے خاتمہ کےلئے اجلاس، فول پروف حکمت عملی پر غور کیا

متعلقہ عنوان :

مزید قومی خبریں