Live Updates

پاک جاپان بزنس کونسل کا فیلڈ مارشل عاصم منیر کو سونے کا تاج پہنانے کا اعلان

فیلڈ مارشل عاصم منیر نے ملکی سلامتی کو مضبوط بنایا ،قوم کو واضح ،پرعزم قیادت فراہم کی جو ہر بحران میں ثابت قدم رہی،رانا عابد حسین

بدھ 21 مئی 2025 21:30

اسلام آباد /ٹوکیو (اُردو پوائنٹ اخبارتازہ ترین - این این آئی۔ 21 مئی2025ء)پاک جاپان بزنس کونسل نے آرمی چیف جنرل سید عاصم منیر کو فیلڈ مارشل کے عہدے پر ترقی ملنے پر مبارکباد پیش کرتے ہوئے سونے کا تاج پہنانے کا اعلان کردیا۔ جاری بیان میں چیئرمین رانا عابد حسین نے کہاکہ جنرل عاصم منیر کو سونے کا تاج بے مثال قیادت، بہادری اور پاکستان سے غیر متزلزل وفاداری کے اعتراف میں پیش کیا جائے گا۔

(جاری ہے)

رانا عابد حسین نے کہا کہ فیلڈ مارشل عاصم منیر نے نہ صرف ملکی سلامتی کو مضبوط بنایا بلکہ قوم کو ایک واضح اور پرعزم قیادت فراہم کی جو ہر بحران میں ثابت قدم رہی۔ انہوں نے کہا کہ ان کی قیادت میں پاکستان نے دشمن کو موثر پیغام دیا اور اندرونی و بیرونی خطرات کا مردانہ وار مقابلہ کیا۔رانا عابد حسین نے وزیر اعظم شہباز شریف کو بھی خراجِ تحسین پیش کرتے ہوئے کہا کہ انہوں نے ایک نڈر اور دیانت دار سپہ سالار پر اعتماد کا اظہار کرتے ہوئے قومی مفاد میں تاریخی فیصلہ کیا۔ یہ فیصلہ قومی وحدت، عسکری استحکام اور پاکستان کے روشن مستقبل کی ضمانت ہے۔