خاندانی منصوبہ بندی کی خدمات کی اہمیت اجاگر کرنے کیلئے ایڈووکیسی ورکشاپ کا انعقاد

ہفتہ 24 مئی 2025 17:24

لاہور (اُردو پوائنٹ اخبارتازہ ترین - اے پی پی۔ 24 مئی2025ء) محکمہ صحت و آبادی اور ’’دی چیلنج انیشیٹو ‘‘کے تعاون سے ہفتہ کو خاندانی منصوبہ بندی کی اہمیت کے حوالہ سے ایک ایڈووکیسی ورکشاپ کا انعقاد کیا گیا۔ورکشاپ میں میڈیا نمائندگان، سوشل میڈیا اور مختلف شعبہ ہائے زندگی سے تعلق رکھنے والے افراد نے شرکت کی۔ تقریب کا مقصد پنجاب میں خاندانی منصوبہ بندی کی ضروریات کو اجاگر کرنا اور عوام میں اس حوالے سے شعور بیدار کرنا تھا۔

اس ورکشاپ کا انعقاد چیف منسٹر پاپولیشن مینجمنٹ اینڈ فیملی پلاننگ پروگرام پنجاب کے تحت کیا گیا۔اس موقع پر ضلعی آبادی ویلفیئر افسر مظہر اقبال نے خطاب کرتے ہوئے کہا کہ پنجاب ملک کا سب سے زیادہ آبادی والا صوبہ ہے اور آبادیاتی چیلنجز کو نظر انداز نہیں کیا جا سکتا۔

(جاری ہے)

انہوں نے 2023 ءکی مردم شماری کے نتائج پر روشنی ڈالتے ہوئے میڈیا سے اپیل کی کہ وہ خاندانی منصوبہ بندی کی اہمیت کے بارے میں عوام میں شعور پیدا کرنے میں اپنا کردار ادا کرے۔

انہوں نے کہا کہ حکومت اعلیٰ معیار کی خاندانی منصوبہ بندی کی خدمات تک رسائی کو بہتر بنانے اور تمام افراد کے لیے بہتر صحت کی سہولیات کی فراہمی کے لیے سنجیدہ اقدامات کر رہی ہے۔ انہوں نے کہا کہ تولیدی صحت کی خدمات کو بہتر بنا کر اور آبادیاتی چیلنجز سے نمٹ کر ملک کے عوام کے لیے روشن مستقبل کی بنیاد رکھی جا رہی ہے۔ورکشاپ میں محکمہ صحت و آبادی کے میڈیکل آفیسر اور مردوں میں خاندانی منصوبہ بندی کے لیے ایڈووکیسی انچارج ڈاکٹر امجد رمضان نے جدید خاندانی منصوبہ بندی کے طریقوں پر روشنی ڈالی اور مردوں کو خاندانی منصوبہ بندی میں شامل کرنے کی ضرورت پر زور دیا۔

انہوں نے کہا کہ مردوں کے لیے مخصوص اقدامات کے ذریعے مانع حمل طریقوں کے استعمال کو فروغ دیا جا سکتا ہے۔ورکشاپ میں "معاشرتی رویوں میں تبدیلی کے لیے میڈیا کا کردار" کے موضوع پر ایک پینل مباحثہ بھی منعقد ہوا، جس میں این جی اوز کے نمائندگان، مذہبی رہنما اور سوشل میڈیا انفلوئنسر شامل تھے۔ مقررین نے میڈیا ہاؤسز، سوشل میڈیا انفلوئنسر ، سرکاری محکموں اور دیگر اسٹیک ہولڈرز کے درمیان تعاون کے ذریعے خاندانی منصوبہ بندی کے فروغ کے لیے نئی حکمت عملیوں پر تبادلہ خیال کیا۔