خان یونس ،اسرائیلی میزائل سے ایک ہی خاندان کی9 بچے شہید

والد حمدی النجار نے اپنی اہلیہ کو ناصر ہسپتال ڈیوٹی پر چھوڑا تھا گھر واپس پہنچتے ہی میزائل حملہ ہوا اس حملے کی تحقیقات جاری، ہدف ایک ایسی عمارت تھی جہاں مشتبہ افراد موجود تھے،اسرائیلی فوج

اتوار 25 مئی 2025 12:55

خان یونس(اُردو پوائنٹ اخبارتازہ ترین - این این آئی۔ 25 مئی2025ء)غزہ کے شہر خان یونس میں ایک دل دہلا دینے والے اسرائیلی فضائی حملے میں ایک ہی خاندان کے 9 بچے شہید ہو گئے۔ غزہ کی شہری دفاعی ایجنسی کے ترجمان محمود باسل نے بتایا کہ یہ بچے ڈاکٹر حمدی النجار اور ان کی اہلیہ ڈاکٹر علاء النجار کے تھے،دونوں ڈاکٹر غزہ میں خدمات انجام دے رہے تھے۔ترجمان کے مطابق حملے کے وقت والد حمدی النجار نے اپنی اہلیہ کو ناصر اسپتال ڈیوٹی پر چھوڑا تھا اور گھر واپس پہنچتے ہی میزائل حملہ ہوا۔

ان کے ایک اور بیٹے 10 سالہ آدم اور والد شدید زخمی حالت میں ہیں۔

(جاری ہے)

واقعے کی ویڈیو میں شدید جلے ہوئے بچوں کی لاشیں دکھائی گئی ہیں جنہیں ملبے سے نکالا گیا۔ بچوں کی نماز جنازہ ناصر ہسپتال میں ادا کی گئی۔اسرائیلی فوج نے کہاہے کہ وہ اس حملے کی تحقیقات کر رہی ہے اور ان کا ہدف ایک ایسی عمارت تھی جہاں مشتبہ افراد موجود تھے۔ انہوں نے خان یونس کو خطرناک جنگی علاقہ قرار دیتے ہوئے کہاکہ عام شہریوں کی ہلاکتوں پر جائزہ لیا جا رہا ہے۔حماس کی وزارت صحت کے ڈائریکٹر جنرل منیر البورش نے سوشل میڈیا پر کہا کہ یہ حملہ اس وقت ہوا جب حمدی النجار اپنی اہلیہ کوہسپتال چھوڑ کر گھر لوٹے۔ انہوں نے کہاکہ غزہ میں صرف ڈاکٹر نہیں، پورے خاندان بھی نشانے پر ہیں۔