یواے ای میںگرمی کا قہر، سویہان میں درجہ حرارت51.6 ڈگری سینٹی گریڈ تک جا پہنچا

شہری زیادہ پانی پئیں، دوپہر کے اوقات میں باہر جانے سے گریز کریں،ماہرین صحت

اتوار 25 مئی 2025 12:55

ابوظہبی(اُردو پوائنٹ اخبارتازہ ترین - این این آئی۔ 25 مئی2025ء)متحدہ عرب امارات میں گرمی کی شدت نے نیا ریکارڈ قائم کر دیا، جب سویہان، العین میں درجہ حرارت 51.6ٖC ریکارڈ کیا گیا، جو کہ سال 2025 کا اب تک کا سب سے زیادہ درجہ حرارت ہے۔نیشنل سینٹر آف میٹیورولوجی کے مطابق یہ درجہ حرارت ہفتہ کی دوپہر1:45 بجے ریکارڈ کیا گیا، جو ملک میں گرمیوں کے سیزن کی ایک شدید اور جلد شروعات کی نشاندہی کرتا ہے۔

یہ شدید گرمی 23 مئی کو ریکارڈ کیے گئے 50.4ٖC کے بعد سامنے آئی ہے، جو کہ 2003 سے مئی کا سب سے زیادہ درجہ حرارت ہے،اس سے پہلے اپریل 2025 نے بھی نیا ریکارڈ قائم کیا تھا جب روزانہ اوسط درجہ حرارت 42.6ٖC تک پہنچا، جو کہ 2017 کے 42.2ٖC کے پچھلے ریکارڈ سے زیادہ ہے۔فلکیاتی طور پر موسم گرما 21 جون کو شروع ہوتا ہے جب سورج آسمان میں اپنی بلند ترین اور شمالی ترین پوزیشن پر پہنچتا ہے، جیسا کہ DAG کی آپریشنز مینیجر خدیجہ الحریری نے بتایا۔

(جاری ہے)

حکام نے شہریوں کو احتیاطی تدابیر اختیار کرنے کی ہدایت کی ہے، خاص طور پر جب درجہ حرارت 50 ڈگری سے تجاوز کر رہا ہو۔ شدید گرمی خاص طور پر بچوں، بزرگوں، حاملہ خواتین اور دائمی امراض کے مریضوں کے لیے سنگین خطرات پیدا کرتی ہے۔ماہرین صحت نے کہاکہ شہری زیادہ پانی پئیں، دوپہر کے اوقات میں باہر جانے سے گریز کریں اور موسمی اپ ڈیٹس کے لیے سرکاری ذرائع سے رجوع کرتے رہیں۔