ہمیں اجتماعی مفادات کے ساتھ ساتھ عملی مفادات پر بھی یقین رکھنا ہو گا،چیف جسٹس صداقت حسین راجہ

ڈنہ کچیلی(اُردو پوائنٹ اخبارتازہ ترین - این این آئی۔ 25 مئی2025ء)چیف جسٹس عدالت العالیہ آزاد جموں وکشمیر جسٹس صداقت حسین راجہ نے سینئر جج عدالت العالیہ جسٹس سردار لیاقت حسین کے ہمراہ عدالت سول جج/ ایڈیشنل تحصیل فوجداری ڈنہ کا افتتاح کر دیا۔ اس موقع پر سابق چیف جسٹس آزادجموں وکشمیر جسٹس چوہدری محمد ابراہیم ضیاء، جوڈیشل آفیسران، وکلاء اور عوام علاقہ کی بڑی تعداد بھی موجود تھی۔

عدالت سول جج/ایڈیشنل تحصیل فوجداری ڈنہ کی افتتاحی تقریب میں آمد پر چیف جسٹس عدالت العالیہ جسٹس صداقت حسین راجہ، سینئر جج عدالت العالیہ جسٹس سردار لیاقت حسین اور سابق چیف جسٹس آزادجموں وکشمیر جسٹس چوہدری محمد ابراہیم ضیاء کا شاندار استقبال کیا گیا۔ وکلاء اور عوام علاقہ نے انہیں ہار پہنائے اور پھولوں کی پتیاں نچھاور کیں۔

(جاری ہے)

پولیس کے چاق وچوبند دستے نے انہیں گارڈ آف آنر پیش کیا۔

تقریب سے خطاب کرتے ہوئے چیف جسٹس عدالت العالیہ جسٹس صداقت حسین راجہ نے کہا کہ آج کا دن اس علاقہ اور میری زندگی کی تاریخ میں ایک انتہائی اہم دن ہے۔ آج میری وکالت اور سروس دورانیے کا خواب شرمندہ تعبیر ہونے جا رہا ہے۔ انہوں نے کہا کہ جب آزاد کشمیر کے مختلف علاقوں میں عدالتوں کا قیام عمل میں لایا جاتا تھا تو میں سوچتا تھا کہ ہمارے علاقہ میں اس کی بیحد ضرورت ہے۔

آج اللہ تعالیٰ کے فضل کرم سے یہاں بھی عدالت کا قیام عمل میں لایا جا رہا ہے۔ انہوں نے کہا کہ ہمیں اجتماعی مفادات کے ساتھ ساتھ عملی مفادات پر بھی یقین رکھنا ہو گا اور مثبت رویوں اور کرداروں کو پروان چڑھانا ہو گا. میں آپ کی محبتوں کا دل کی گہرائیوں سے مشکور ہوں آج آپ نے میری اور میرے ساتھ آئے مہمانان گرامی کی جو عزت افزائی کی میں اس قرض کو سود سمیت واپس کروں گا۔

انہوں نے کہا کہ میں اپنی ذات کے علاؤہ کسی کا محتاج نہیں رہا لوگوں کے جائز حقوق کی بات کی کسی کی بھی حق تلفی نہیں کی میں نے کبھی زبانی بات نہیں کی اعلانات پر عمل درآمد کروانے والا انسان ہوں وہ کام کرتا ہوں جس پر فوری عمل درآمد ہو سکے۔ آخر میں انہوں نیتقریب آمد تمام لوگوں کا شکریہ ادا کیا۔ تقریب سے خطاب کرتے ہوئے سابق چیف جسٹس چوہدری محمدابراہیم ضیاء نے کہا کہ آج کا دن اس علاقہ کی تاریخ میں بہت اہمیت کا حامل ہی. جسٹس صداقت حسین راجہ اس علاقہ اور آزاد کشمیر کی عظیم شخصیت ہیں اور آزاد کشمیر میں نمایاں مقام رکھتے ہیں۔

یہاں کے لوگ پڑھے لکھے اور اعلیٰ کردار اور عمدہ اخلاق کے مالک ہیں. معاشرے میں انصاف ضروری ہے ہمیں انصاف کا دامن تھامے رکھنا چاہیے ہر ایک کو چاہیے کہ ماحول کو پرامن رکھنے کے لیے اپنا کردار ادا کرے۔ تقریب کے اختتام پر عوام علاقہ کی جانب سے سابق چیف جسٹس آزادجموں و کشمیر چوہدری محمد ابرہیم ضیاء اور ممبر ضلع کونسل ڈنہ راجہ طارق بشیر ایڈوکیٹ نے چیف جسٹس عدالت العالیہ جسٹس صداقت حسین راجہ کو شیلڈ پیش کی-