Live Updates

،ایم کیو ایم کے مصطفیٰ کمال، خالد مقبول کابینہ میں ہیں، انہیں چاہیے کوئی بڑا پیکج کراچی کے لیے لے کر آئیں، میئر کراچی

اتوار 25 مئی 2025 19:00

کراچی (اُردو پوائنٹ اخبارتازہ ترین - آن لائن۔ 25 مئی2025ء)میئر کراچی مرتضیٰ وہاب نے کہا ہے کہ ایم کیو ایم کے مصطفیٰ کمال اور خالد مقبول کابینہ میں ہیں، انہیں چاہیے کوئی بڑا پیکج کراچی کے لیے لے کر آئیں۔کراچی میں میڈیا سے گفتگو کرتے ہوئے مرتضیٰ وہاب نے کہا کہ ایمپریس مارکیٹ پر کام ہم نے کیا اور کام جاری ہے، ڈینسو ہال کی یہ عمارت 139 سال پرانی ہے، یہاں اس شہر کی پہلی عوامی لائبریری تھی، 1886ء میں انگریزوں نے عوام کے لیے یہ لائبریری بنائی تھی، 1980ء میں اس عمارت کو عوام کے لیے بند کر کے آفس بنا دیا گیا۔

انہوں نے کہا کہ میکس ڈینسو کے نام سے اس عمارت کا نام رکھا گیا، بدبختی ہے اس کو سرکاری دفتر میں تبدیل کر کے بچوں سے یہ لائبریری چھین لی گئی، 2007ء میں کے ایم سی نے اس عمارت کو نجی پارٹی کو دے دیا، 2007ء سے 2023ء تک یہ عمارت عوام کے لیے مکمل بند رہی تھی۔

(جاری ہے)

ان کا کہنا ہے کہ ایم اے جناح روڈ پر ٹرپل پارکنگ ہوتی ہے ایک پیسا کے ایم سی کو نہیں ملتا، شہر میں پارکنگ کو ریگولیٹ کرنے کی ضرورت ہے، چاہتا ہوں ایم اے جناح روڈ پر سنگل لین پارکنگ ہو، شہری کسی اور ملک میں جا کر ٹریفک قوانین پر عمل کرتے ہیں تو یہاں کیوں نہیں۔

میئر کراچی نے مزید کہا کہ جماعت اسلامی والے اپنے ٹاؤن میں پارک بند کر کے یونیورسٹی کو دے دیتے ہیں، جماعت اسلامی والے اپنی سوچ کے ساتھ چلتے رہیں میں ہر جماعت کے ساتھ چلنا چاہتا ہوں۔ مرتضیٰ وہاب کا کہنا ہے کہ ہم عید الاضحیٰ کے بعد نالوں کی صفائی کا کام شروع کردیں گے، عید الاضحیٰ کے دوران مختلف علاقوں میں 100 کلیکشن پوائنٹس بنائیں گے۔