Live Updates

عراق میں پانی کے ذخائر 80 برسوں میں کم ترین سطح پر آگئے

پیر 26 مئی 2025 10:00

بغداد (اُردو پوائنٹ اخبارتازہ ترین - اے پی پی۔ 26 مئی2025ء) عراق کے حکومتی اہلکار کا کہنا ہے عراق میں پانی کے ذخائر ڈرائی رینی سیزن کے بعد 80 برسوں میں اپنی کم ترین سطح پر ہیں کیونکہ دریائے دجلہ اور فرات سے پانی کا حصہ کم ہوتا جا رہا ہے۔عرب نیوز کے مطابق عراقی حکام ہمسایہ ملکوں ایران اور ترکی میں اوپر بنائے گئے ڈیموں کو بھی دجلہ و فرات کے بہاو میں ڈرامائی کمی کا ذمہ دار قرار دیتے ہیں، یہ دونوں دریا صدیوں سے عراق کو سیراب کرتے آئے ہیں۔

عراق کی وزارت آبی وسائل کے ترجمان خالد شمال نے اے ایف پی کو بتایا’ موسم گرما کا آغاز کم از کم 18 بلین کیوبک میٹر پانی سے ہونا چاہیے لیکن ہمارے پاس صرف 10 بلین مکعب میٹر پانی ہے۔ انہوں نے کہا کہ گذشتہ برس ہمارے سٹریٹجک ذخائر بہتر اور موجودہ ذخائر سے دگنا تھے۔

(جاری ہے)

انہوں نے مزید کہا کہ ہم نے 80 برسوں میں اتنا کم ذخیرہ نہیں دیکھا۔ یہ زیادہ تر دو دریاؤں کے کم بہاو کی وجہ ہے۔

خالد شمال نے دعوی کیا عراق کو اس وقت دریائے دجلہ و فرات سے اپنے حصے سے 40 فیصد سے کم پانی ملتا ہے۔انہوں نے کہا کہ اس موسم سرما میں کم بارش اور برف پگھلنے سے پانی کی سطح کم رہی جس سے عراق میں صورتحال مزید خراب ہو گئی ہے۔ اقوام متحدہ عراق کو ان پانچ ممالک میں سے ایک قرار دیتا ہے جو موسمیاتی تبدیلیوں کے بعض اثرات سے سب سے زیادہ متاثر ہیں۔

پانی کی کمی نے عراق میں بہت سے کسانوں کو اپنی اراضی چھوڑنے پر مجبور کر دیا ہے۔ حکام نے پینے کے پانی کی مناسب فراہمی کو یقینی بنانے کے لیے زرعی سرگرمیوں میں نمایاں کمی کردی ہے۔پانی ،عراق اور ترکی کے درمیان تنائو کا سبب رہا ہے۔ 2024 میں عراق اور ترکی نے دس سالہ فریم ورک معاہدے پر دستخط کیے جو آبی وسائل کے بہتر انتظام کو یقینی بنانے کے منصوبوں میں سرمایہ کاری کرنے کے لیے ہے۔